Cimatu nahuwasan sa iyang kabalaka sa Cebu Province

GIPAHINUMDOMAN ni Inter Agency Task Force (IATF) chief implementor for the Visayas Secretary Roy Cimatu ang kadagkoan lukop lalawigan sa Sugbo nga bisan paman og may nakitang pag us-os sa kaso sa coronavirus disease, kinahanglan gihapon nga mosubay sa health protocol aron malikay sa kagaw.

Kini maoy gipahibaw ni Cimatu atol sa tigom kauban si Cebu Governor Gwendolyn Garcia ug ang kadagkoan sa mga lungsod ug syudad sa probinsya sa Sugbo. Si Cimatu nabalaka sa iyang gituohang nagsaka nga mga kaso sa Covid-19 sa Lalawigan sa Sugbo.

Sa maong tigom, nitaho ang gobernador kang Cimatu sa sitwasyon sa Probinsya.

Base sa data Department of Health (DOH), ang Lalawigan sa Sugbo dunay 1,919 ka mga kaso, 1,162 niini naka-recover na samtang 757 na lang ang aktibo.

Matod ni Cimatu nga nabalaka siya nga mahisama unya ang probinsya sa sitwasyon sa Manila nga sa dihang gipaluagan ang community quarantine, misulbong na hinuon ang mga kaso niini.

“This is the reason why I asked the President for this meeting kasi hindi ko gusto na magaya ang Cebu Province sa Metro Manila. Hindi ko gusto na mag-suffer ang ating tourism,” matod ni Cimatu sa Agusto 4.

Sa kasamtangan, gipaubos na sa modified general community quarantine (MGCQ) ang Probinsya. Apan gipasabot ni Garcia nga bisan kon taas ang positibong kaso, menos lang ang aktibo niini.

Ang kinatibuk-an nga population sa Probinsya moabot sa 3.2 milyones.

Dugang sa gobernador nga duna pa’y igo nga mga bakante nga higdaanan sa mga provincial hospital kay tungod anaa lang sa 24 porsyento ang occupancy rate niini.

May 215 ka mga pasyente sa Probinsya ang kasamtangan nga na admit sa mga hospital samtang 542 ang anaa sa isolation facilities.

Kontento hinuon si Cimatu sa report sa Probinsya apan gipasidan-an ang kadagkoan sa mga lungsod nga di mokompyansa sa padayon nga nasinati nga pandemya sa Sugbo.

“Honestly, I was worried about the Province of Cebu but after this presentation, Governor, nawala na yung worry ko,” matod ni Cimatu.

Si Cimatu, sa sayo pa, namahayag nga hayan ang tulo ka mga lokalidad sa Lalawigan sa Sugbo mapailawom na sa MGCQ tungod sa nagkaminos nga gidaghanon sa mga nangatakdan ug nagkadaghan og nangaulian.

Ang Siyudad sa Talisay ug mga lungsod sa Minglanilla ug Consolacion pabiling naa sa general community quarantine tungod sa taas nga mga kaso sa Covid-19. Apan ning nanglabay nga mga adlaw, nagkagamay na lang ang nangatakdan ug mas nanaghan ang nangaulian.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph