SUPERBALITA CEBU

Makatambong na og misa

NANGLIMPYO: Ang mga tiglimpyo nanghawan sa Pilgrim Center sa Basilica Minore del Santo Niño agi og pangandam sa mga misa nga ipahigayon sa Dominggo, Agusto 9, 2020. Ang Inter Agency Task Force (IATF) miuyon sa hangyo ni Cebu City Mayor Edgardo Labella nga tugtan ang mga simbahan nga makapasulod og 10 porsyento sa iyang kapasidad matag misa. (Alex Badayos)

MAMAHIMO nang mopasulod og mga manimbahay hangtod sa 10 porsyento sa seating capacity ang mga simbahan ug ubang relihiyusong mga kalihukan sa Dakbayan sa Sugbo.

Kini human giaprobahan sa Inter-Agency Task Force (IATF) ang hangyo ni Cebu City Mayor Edgardo Labella nga tugtan ang mga simbahan nga makapasud og 10 porsyento sa ilang kapasidad matag misa.

Nunot niini, nipagawas og bag-ong executive order si Cebu City Mayor Edgardo Labella aron pag-usab sa Section 2 (J) sa iyang EO nga gipagawas sa miaging semana.

Ang karaan nga EO nag-asoy nga kutob sa 10 ka mga tawo ang mamahimong makasud sa simbahan ug moapil sa uban pang kalihokan nga relihiyoso.

Niluwat siya sa bag-ong kamandoan sa Sabado, Agusto 8, 2020. Ang EO 86 (J) naglatid na nga, “religious gatherings shall be allowed up to 10 percent of the seating capacity, or up to 10 people, whichever is higher.”

Ipatuman gihapon ang estrikto nga health protocol sama sa pagsul-ob og face masks, pag-obserbar og social distancing, ug pagbutang og hygiene necessities sa lain-laing parte sa balay-ampoan.

Nagpasabot usab kini nga kinahanglan nga ang mosimba magdala og quarantine pass.

Gilatid usab sa maong EO nga di gihapon mamahimo nga molapas sa 10 ka indibidwal matag grupo ang makabisita sa mga sementeryo ug uban pang memorial parks.

Makadesisyon sab ang tigdumala sa sementeryo kon pila ka mga grupo ang ilang pasudlon sa mao nga oras.

Gawas sa religious activities, gitugot sab ang mass gathering alang sa critical government services ug authorized humanitarian activities.

Ubang klase sa mass gatherings sama sa movie screenings, concerts, sporting events, ug laing entertainment activities, community assemblies, ug non-essential work gatherings wa gihapon gitugot. Ang Dakbayan sa Sugbo gipaubos sa general community quarantine (GCQ) hangtod sa Agusto 15.

Sa mga miaging adlaw, nipahibawo si Labella nga nihangyo siya sa IATF nga tugutan ang mga simbahan sa Sugbo nga modawat og di lang kutob sa 10 ka indibidwal tungod kay daghang dagko nga simbahan ang nahimutang sa dakbayan.

“Nakasabot ko nga daghan sa atong katawhan gusto na gyod maka-simba mao nga nihangyo ko sa IATF ug gitugtan na nila nga 10 percent sa seating capacity sa matag simbahan ang makasimba,” segun ni Labella.

Sa miaging semana, gipahibaw usab ni Labella nga mamahimo nang makagawas sa matag Dominggo ang tanang quarantine pass holders, odd o even, ang katapusang numero sa codes.

Sukad pa niadtong enhanced community quarantine (ECQ) pa ang status sa dakbayan, way gitugutan nga makagawas matag Dominggo, gawas lang sa mga tawo nga authorized persons outside residence (Apor).

Gibag-o ni Labella ang iyang kamanduan human nidailos ang status sa dakbayan ngadto sa GCQ ug aron usab makapamalit ang ubang residente og essential goods ug makaapil sa religious activities.

Nakigkita si Labella sa mga lider sa simbahan sa dakbayan sa Sabado aron pagtuki sa iyang bag-ong EO nga gipagawas.

NALIPAY

Sila si Monsigñor Joseph Tan, spokesperson sa Archdiocese of Cebu, ug Fr. Aladdin Luzon, OSA sa Basilica Minore del Sto. Niño nihangop ning mao nga kalambuan.

“Nindot ni kay para makahinay hinay na tag adjust kay ready naman ang mga simbahan sa mga markings (for social distancing) and sanitations,” matod ni Tan.

Base sa iyang bana-bana, ang Cebu Metropolitan Cathedral makapasud og mga 150 ka tawo matag misa base sa 10 porsyentong gitugot sa IATF.

Si Luzon, sa iyang bahin, nipasalamat kang Labella ug sa IATF sa pag-uyon sa hangyo sa mayor. Matod niya nga ang Basilica makapasud lang og mga 350 ka mga deboto ug pilgrim matag misa sa Pilgrim Center grounds.

“Ang katong mga managkot, lahi sab sila nga agianan,” siya nagkanayon.

IPAIHAP

Kapulisan sa dakbayan sa Sugbo makigtagbo sa pastoral guards sa simbahang Katoliko human mitugot na ang IATF sa pagpahigayon og mga relihiyusong kalihukan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph