BISAN nia kita panahon sa coronavirus disease (Covid-19) pandemic, dili gyud kalikayan nga isal-ot gihapon ang dunot nga sistema sa pamolitika, sa Dakbayan sa Digos, giintrigahan ang administrasyon ni Mayor Josef Cagas nga kuno maoy nagbuot nga ang gamiton nga face mask kadtong disposable.
Pero sa atong pagpakighinabi kang Mayor Cagas, wala siyay mando nga ingon niana, bisag pa’g binuhat o washable nga klase sa facemask pwede, ang pinakalabing importante nga ang tanang mga tawo sa mga barangay nga nahisakop sa Siyudad sa Digos mag facemask gyud.
Bisa’g asa sila muadto magtrabaho man o dili bisan og mobisita kalang sa imong silingan kinahanglan sundon ang mga protocol.
Nagpasalamat si Mayor Cagas niining panahon sa pandemic nga wala kaayo ma-igo pag-ayo ang siyudad sa Digos, tingali gikaloy-an usab sa atong Labaw’ng Makagagahum tungod kay sa milabayen’g tuig bulan sa Oktubre dili pud basta basta ang nahiagoman sa iyang siyudad nga gitay-og sa kusog nga linog, ug ang uban nga mga lumolopyo wala pa maka-recover.
Atong gipanid-an ang mga lihok sa mayor, pipila lang ka oras sa iyang opisina sa City Hall human sa pagpamirma sa mga importanteng mga papeles, manaug gilayon ug to-a sa mga barangay mobisita aron masayran og unsay mga nag-unang problema nga hatagan gilayon og solusyon.
Walay pamolitika kay layo pa ang iyang panahon, 2022 pa, ang iyang pagbisita sa mga barangay mao ang pagtuman sa iyang mandato sa matag suliran sa mga barangay kinahanglan iyang mahibaw-an aron hatagan gilayon og solusyon labaw sa tanan ning panahon sa Covid-19.
Dunay mga balaod sa nasyunal mahitungod niining Covid-19, nga gisunod sa mga local government units (LGUs), pero matud pa ni Mayor Cagas ang lokal nga gobyerno aduna sab katungod sa pagpatuman sa lokal nga kamandu-an alang sa iyang mga katawhan.
Ang mensahe ni Mayor Cagas sa iyang katawhan sa Dakbayan sa Digos, sundon ang mga istriktong mga balaod kinahanglan sama sa pagtuman sa curfew alas 9 sa gabii hangtud sa alas 5 sa buntag, tagsa ka metro ang distansiya sa mga tawo nga gusto mong estoryahon.
Karong bag-o gidugang sa nasyunal ang face shield sa mga pasahero sa mga pampublikong sakyanan diin kini sab ang mapatuman sa mga pedecab ning Dakbayan sa Digos.
Sumala pa ni Mayor Cagas kining estrikto nga pagpatuman di kini alang kang kinsa, kon dili para sa atong kaayuhan nga dili mokuyanap ang Covid-19 sa atong Dakbayan sa Digos.
Dugang mensahe sa mayor, nga atong ubanan og pag-ampo nga matapos na kining maong trahedya nga kapin na sa tuig, tungod kay hilabihan na ang pagkahugno sa atong ekonomiya, hinaut nga magmatinumanon ang tanan ug dili magpabadlong.