DIGOS CITY -- Nahimong madugoon ang adlaw sa semana sa dakbayan human gipusil-patay ang usa ka laborer tumong sa iyang ulo nga milapos sa likod nga parte, alas 5:45 sa hapon niadtong Sabado, Agosto 8, 2020.
Sa tahong gipaguwa sa Digos City Police Station (DCPS), nailhan ang biktima nga si Jason Miano Baya, ulitawo nga residente sa Purok Madasigon sa Barangay Tres de Mayo.
Matod ni Lieutenant Colonel Vici Anthony Tababa, hepe sa DCPS, nga naglingkod lamang ang biktima sud sa nakaparadang trisikel didto sa Sugar Road, dihang kalit miabot ang wa mailhing mamumuno ug wa’y daghang rason nga gipusil kini.
Nakaresponde pa ang mga sakop sa City Disaster Risk Reduction and Management Office (CDRRMO) aron dalhon ang biktima sa bay tambalanan.
Apan, gilayon na kining gibawian sa hinulamang kinabuhi human nabangag ang ulo sa igo sa bala sa wa matinong kalibre sa armas.
Wa pa sab matudlong suspek sa krimen sanglit wa’y bisan usa sa lugar nga nakakita kinsa ang mamumuno ilabi pa nga nakasibat na kini dihang nahidangat ang kapolisan.
Gibutyag sab sa mga Lieutenant Lodimer Aulida, pamuno sa Provincial Crime Laboratory Office, nga wa sila’y nakitang basyong bala o tingga human gihimo ang imbistigasyon sa crime scene.
Mihimo na ang DCPS og lawom nga imbestigasyon hayan masuta ang motibo sa krimen ug madakpan ang kriminal.