ASUNCION, Davao del Norte -- Usa ka tarsier ang napalgan ug gidakop sa mga mag-uuma didto sa kalasangan sa Purok 3 sa Sitio Rizal, Barangay Binancian.
Sa gihimong pakipaghinabi sa Sunstar Superbalita kang Mayor Eufracio Dayaday, Jr., sa Asuncion gibutyag sa mayor nga alas 10 sa buntag, Agosto 5, 2020, dihang gitunol ngadto kaniya ang tarsier pinaagi ni Jireh Jones Arejo, ang administrative Aide sa opisina sa Municipal Engineers (MEO).
Si Jireh Jones sumala pa, gisugo sa iyang iyaan nga si Kapitan Emelita Arnejo, kapitan sa Barangay Binancian aron matunol ngadto kang Dayaday, Jr., ang maong tarsier.
Gibutyag nga ang tarsier nakit-an sa mga nagtrabaho sa umahan sa usa ka Romy Asas nga tungod kay wa masayod sa klase sa maong mananap gidakop kini sa mga mag-uuma pinaagi sa pagbunal og kahoy hinungdan nga nasamdan sa mata.
Matud pa nga sa dihang nakit-an ni Kapitan Arnejo ang tarsier nga nadakpan, naluoy kini sa mananap nga nagkadugo ang mata hinungdan nga nakahukom nga i-turnover ngadto sa opisina sa mayor.
Sa pagtunol kang Dayaday, gipadala gilayon ang maong tarsier sa opisina sa Municipal Environment and Natural Resources (Menro) aron nga mahatagan og igong medikasyon.
Gisulti ni Dayaday, Jr., nga ang maong tarsier ipaubos sa pag-amuma sa lokal nga panggamhalan sa lungsod subay sa awhag sa Department of Enviroment and Natural Resources (DENR).
Sumala pa nga sa pagkakaplag sa maong tarsier timailhan nga dunay kabahin sa kalasangan sa Barangay Binancian nga matawag nga virgin forest nga nagpasabot nga wala kaayo naadtuan sa mga tawo ug posible nga dunay pay daghang mga tarsier sud sa lasang.