BANSALAN, Davao del Sur -- Nabangalan nga wa na’y kinabuhi ang usa ka piniriso dihang gidala sa bay tambalanan, ala 1:40 sa kaadlawon niadtong Sabado, Agosto 8, 2020.
Sa gipaguwang taho sa Bansalan Municipal Police Station, nailhan ang namatay nga si Noel Ubas Selgas, 33, vendor nga aduna’y kapuyo sa Villa Doneza Street, Barangay Poblacion Dos sa lugar.
Sa imbestigasyon nga gimando ni Major Peter Glenn Ipong, hepe sa kapolisan, nasayran nga banda alas 12:55 sa tungang gabii, nakasinati og paglisod sa ginhawa ang binilanggo human nalipong mao nga dali kining gidala sa Mabama Medical Hospital.
Matod ni Ipong nga nakaistorya pa ang maong preso dihang gikuhaan kini og blood pressure ug gipailawom sa physical examination sa mga nars.
Apan, samtang gihuwat ang doktor nga mohiling niini, subling nakasinati og pagkalipong ug milabay ang pila ka minuto kalit nga nakuyapan.
Sumala sa kapulisan nga gitabang kini ni Dra. Francis Margaret L. Casimiro-Torate apan pakyas nga maluwas human gideklarang namatay sakto ala 1:40 sa kaadlawon.
Nasuta sa resulta sa test nga namatay ang pinireso tungod sa Acute Myocardial Infraction.
Ang maong pinereso nag-atubang sa kasong paglapas sa acts of lasciviousness in relation to Republic Act 7610 ug di pa dugay nasikop.
Sa kasamtangan, gipahiluna na sa pamilya ang haya sa biktima human nasubo sa pagpanaw niini.