KIDAPAWAN CITY -- Personal nga atraso ang gilantaw sa mga awtoridad nga motibo sa pagpatay sa usa ka mag-uuma alas 6:05 sa gabii niadtong Sabado, Agusto 8, 2020, sa probinsya sa Cotabato.
Giila ang biktima nga si Democracy “Bang-Bang” Doktolero, 30-anyos, minyo ug molupyo sa Barangay Saranay, Makilala, North Cotabato.
Sa taho sa Makilala Philippune National Police nga mipalit lamang og litsong manok ang biktima uban ang iyang tulo ka anak sa Barangay Poblacion.
Kalit lang mibutho ang duha ka wala mailhing tawo ug gipusil si Doktolero gamit ang kalibre .45 nga pistola.
Abtik sab nga miikyas ang mga suspetsado sakay sa motorsiklo paingon sa hilit nga dapit sa Makilala.
Dead on the spot si Doktolero nga naigo sa iyang ulo ug tangkogo.
Daw gikumot ang kasing-kasing sa mga sibilyan sa grabeng paghilak sa tulo ka bata nga naggakos sa ilang amahan nga naligo sa iyang kaugalingon.
Usa sa mga anak sa biktima nagsinggit nganong gipusil ang ilang amahan nga wala man kini kaaway o atraso sa ubang tawo.
Magpalit lang unta og litsong manok ang biktima nga ilang isud-an sa ilang panihapon.
Sa kasamtangan ang Makilala PNP ang blangko pa sa motibo sa pagpatay sa biktima ug padayon pa silang nag-imbestiga.