ANG Cebu City Prevention, Rehabilitation, Order, Beautification and Enhancement (Probe) nakadakop og 266 ka mga tawo nga nakalapas sa quarantine sa mga alas 5 sa Dominggo sa hapon, Agusto 9, 2020, unang Dominggo nga ang tanang nagkupot og quarantine gitugotan nga makagawas bisan unsa nga numero sa ilang code.
Si Probe chief Raquel Arce njpahimangno nga ang mga makalapas di na pahimuon og community service ug physical exercise sugod sa Agusto 16, dihang ang City Ordinance No. 2566 kun “An Ordinance Penalizing any Violation in Relation to the Implementation of General/Enhanced Community Quarantine in Cebu City During Public Health Crisis” moepekto na, apan dunay naghuwat nga bug-at nga mga multa.
Nagtuo si Arce nga ang gitakdang pagpatuman sa Kagamhanan sa Dakbayan sa Sugbo sa Agusto 16 batok sa mga malapason sa quarantine magdisiplina sa mga lumolupyo sa Dakbayan sa Sugbo.
Matod ni Arce nga sagad sa mga kalapasan sa mga lumolupyo mao ang paggawas nga way dala nga quarantine pass.
Si Arce niingon na sa unang semana sa general community quarantine sa siyudad, ang Probe team nakadakop og kapin sa 1,000 ka quarantine violators.
“Siguro ang atong pag-hold nila og pila ka oras lang nya pagpa-physical exercise ug community service, di pa siguro na siya igo para nila nga motagam sila ug madisiplina sila,” sulti ni Arce sa SunStar Cebu sa usa ka interview.
“Higayon na ni nga seryosohon na gyud ni sa kadaghanan,” dugang ni Arce.
Si Arce, niingon nga ang pagpatuman sa City Ordinance 2566 malisod alang sa Siyudad tungod sa krisis nga giatubang sa publiko, apan kon pinaagi lang ning ordinansaha madisiplina ang katawhan, estrikto kini nilang ipatuman. (JJL)