SUPERBALITA CEBU

52 sakop sa frat nasikop

KALINGAWAN NASANTA: Ang kasaulogan sa anibersaryo sa usa ka inilang fraternity/sorority sa Minglanilla chapter human gironda sa kapulisan ug nakalapas kini sa social distancing lakip sa dinaghang panagtapok atol ning kuwarentina. (Benjie T. Talisic)

NIKABAT sa 52 ka mga sakop sa usa ka inilang fraternity/sorority sa Minglanilla Chapter ang nadakpan sa mga sakop sa kapulisan niadtong Sabado sa gabii, Agusto 8.

Kini human gironda sa mga operatiba sa Regional Intelligence Division (RID)-7 ug Minglanilla Police Station ang lugar kon asa nagpahigayon sa pagsaulog ang grupo sa ilang anibersaryo nga nahimutang sa Sityo Pitog, Barangay Tubod, lungsod sa Minglanilla.

Ang maong grupo nagsaulog sa ilang ika-47 nga tuig sa ilang tinuig nga pagdumdum sa pagkatawo sa maong grupo.

Matod ni Police Major William Homoc, hepe sa Minglanilla Police Station, nga kuyog nila ang mga operatiba sa RID-7 ug giadto ang lugar human sila makadawat og report kalabot sa usa ka kalihukan.

Ang maong dapit usa ka pribado nga lugar nga dakong hawan apan makita ra ang mga tawo nga anaa sa sulod sa maong lugar.

Dugang ni Homoc nga nakalapas ang mga dinakpan sa wala pagsunod sa social distancing ug dinaghang panagtapok sanglit ang maong lungsod anaa paman ubos sa general community quarantine (GCQ).

Unang nasayran nga moabot sa 64 ang mga gipangdala sa estasyonan sa kapulisan sa maong lungsod.

Apan gitin-aw ni Homoc nga ang 10 niini walay labot tungod kay maoy nag-operate sa sounds.

Samtang ang uban mga gisugo nga maoy niluto sa mga sud-an nga ilang gihanda.

Samtang ang duha ka mga pulis nga sakop sa Naga City Police nga mga miyembro sa maong grupo posibleng mag-atubang og lahi nga kaso.

Matod ni Homoc nga ang Police Regional Office (PRO) 7 na ang moimbestigar kanila kon nganong anaa ang ilang presensiya sa lugar sa ilang pag-abot atol sa pagresponde sa dapit.

Si Philip Engbino, usa sa mga nag-supervise sa maong kalihukan, niingon nga igo lang sila nagpahigayon sa ilang tinuig nga anibersaryo ug wala magdahum nga anhaon sila sa kapulisan.

Dugang ni Engbino nga gitahud nila ang gipatuman sa kagamhanan apan lagi tungod sa ilang kalapasan nga nahimo wala sila mabuhat gawas sa pagsunod sa pulis.

Ang grupo ni Engbino paingon na unta mouli apan naabtan lang gyud sila sa mga pulis. (BBT)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph