KASONG paglapas sa Republic Act 8048, kun Coconut Preservation Act (RA) of 1995, ang atubangon sa lima ka mga indibiduwal human madakapan sa kapulisan sa Barangay Conception, Mawab, Davao De Oro.
Mga gidakop mao sila Benigno Secuya Purisima, 65; Fortunato Ewat Omod, 33, molupyo sa Purok 1, Barnagay Conception; Aram Ramada Abrencia, 33; Lilian Martinez Abrencia, 70, molupyo sa Purok 7, Nueva Visayas; ug si Gentrudes Natad Payao, 59, taga Purok Calamban La Filipina, Tagum City.
Subay sa report, alas 10 sa buntag niadtong Sabado, ang hiniusang puwersa sa Mawab Municipal Police Station, uban sa lain pang yunit, nagpahigayon og manhunt Charlie operation nga miresulta sa pagkasikop sa mga suspek sa maong dapit.
Ang pagdakop nahisubay sa warrant of arrest nga giisyu ni Presiding Judge Leah Garnet G. Solde-Annogui sa 3rd Municipal Trial Court sa Nabunturan-Mawab-Montevista nanukad sa kasong RA 8048 nga dunay criminal case number 8260-20, nakapetsa Hulyo 28, 2020 kon diin balor og P6,000 matag usa ang girekomendang piyansa sa korte.