TACURONG CITY -- Usa ka taas nga lider sa New People's Army (NPA) ang nadakpan sa mga awtoridad alas 4:15 sa hapon niadtong Dominggo, Agusto 9, 2020.
Giila ang nadakpan nga si Juanito Sargas alyas Kumander Alvin sa Sargan Group sa Daguma Far South Mindanao Region sa Guerilla Front Committee 72.
Gibutyag ni Palimbang Chief of Police, Major Joel Martinez nga nakadawat sila og taho nga si Sargan miuli sa iyang balay sa Barangay Kipungit, Palimbang, Sultan Kudarat.
Abtik nga nagpahigayon og operasyon ang Palimbang Municipal Police Station (PMPS) ug nadakpan si Sargan.
Narekober gikan sa posisyon ni Kumander Alvin ang usa ka kalibre .45 nga pistola, mga bala, duha ka magazine ug mga personal nga kagamitan.
Nasayran nga ang suspek dunay warrant of arrest sa kasong multiple murder ug multiple frustraded murder.
Sa kasamtangan, si Kumander Alvin gibalhog sa selda sa PMPS ug gitakdang ipresenta ngadto sa korte.