ANAA na sa 180 ang natalang kaso sa coronavirus disease (Covid-19) sa Cagayan de Oro human duha ka mga returning overseas Filipino workers (ROFs) ug usa ka locally stranded individual (LSI) ang nagpositibo sa reverse transcription-polymerase chain reaction (RT-PCR) test.
Matud ni City Health Office Epidemiologist Dr. Joselito Retuya, ang tulo nga mga pasyente nga coronavirus-positive naa na karon sa Temporary Treatment and Monitoring Facility.
Ang ika-178th nga kaso usa ka 26 anyos nga lalaki nga LSI gikan sa ParaƱaque ug residente sa Barangay Lapasan. Ang lalaki nagtrabaho isip usa ka service crew. Wala siya gi-swab sa Manila, matud ni Retuya.
Miabot siya sa Cagayan de Oro pinaagi sa eroplano Agosto 2. Siya gi-swab Agosto 7 ug ang resulta migawas nga positibo sa Agosto 8.
Ang 26 anyos nga lalaki ingon asymptomatic ug wala'y comorbidity.
Ang ika-179 nga kaso usa ka 31 anyos nga babaye nga ROF gikan sa Middle East ug residente sa Barangay Mambuaya. Miabot siya sa Manila Hulyo 13 diin siya gi-swab ug negatibo ang resulta.
Matud ni Retuya, ang babaye nagpabilin sa usa ka hotel sa Manila gikan Hulyo 13 hangtod Hulyo 26 ug gibalhin siya sa laing hotel sa Muntinlupa kung diin siya nagpabilin gikan Hulyo 27 hangtod Agosto 1.
Miabot siya sa Cagayan de Oro Agosto 2 pinaagi sa eroplano. Gi-swab siya Agosto 7 ug ang resulta migawas nga positibo sa Agosto 8.
Ang 31 anyos nga babaye usa ka asymptomatic ug wala'y comorbidity. Naka-identify ang City Health Office og usa ka close contact sa babaye.
Ang ika-180 nga kaso usa ka 65 anyos nga babaye nga ROF gikan sa United States ug residente sa Barangay Kauswagan. Miabot siya sa Manila Hulyo 26.
Ang babaye miabot sa Cagayan de Oro Agosto 2 sakay sa eroplano ug gi-swab Agosto 7. Ang resulta migawas nga positibo Agosto 9.
Sumala ni Retuya, ang 31 anyos nga babaye nakasinati og sipon ug adunay postnasal drip busa kini gitambalan. Ang babaye adunay usab ka comorbidity nga hypertension diabetes mellitus.
Si Acting City Health Officer Dr Lorraine Nery nagkanayon nga ang Cagayan de Oro adunay 58 nga mga active cases, diin lima niini ang mga outpatients ug 53 ang mga ROFs/LSIs.