GIBUTYAG ni Phoenix Pulse Fuel Masters forward Calvin Abueva nga nakadawat siya og tanyag gikan sa duha ka managlahing mga nasod dihang napahamtangan siya og indefinite suspension sa Philippine Basketball Association (PBA) sa miaging tuig.
Sa interbyu sa Power & Play program ni kanhi PBA Commissioner Noli Eala, gipahibalo sa gitawag og “The Beast” nga gawas niini, nakadawat sab siya’g tanyag aron moduwa sa laing liga dinhi mismo sa Pilipinas.
“Maraming nago-offer, since na-suspend ako -- dito sa MPBL, or sa Thailand, dito sa Japan,” matod ni Abueva, kinsa gisupenso sa PBA niadto pang Hunyo, 2019 ug wala pa kini nalibkas hangtod karon.
Human ni Thirdy Ravena, si Abueva gitanyagan sab sa usa ka team sa Japan B. League aron mahimong Asian import.
Apan giklaro ni Abueva nga ang tanang tanyag nga iyang nadawat pulos niya gibalibaran.
“Hindi pa po ako umo-oo sa mga ‘yan... May dapat po akong tapusin dito sa problema ko, bago po ako kukunin ng iba,” pasabot ni Abueva nga napatik sa www.abs-cbnnews.com.
“At least, tapos na ang problema ko. Ang sa akin po, dito po ako sumikat, siyempre, dito rin po ako magtatapos. Kung aalis kang bigla-bigla na may problema ka dito, pagbalik mo, sirang-sira ka na. Ibibigay ko po ang laro ko sa PBA.”
Sa kasamtangan, padayong gituman ni Abueva ang mga tahas nga gihatag sa PBA ngadto kaniya aron malibkas ang iyang suspensyon.
Lakip niini ang drug test, community service, therapy sessions sa usa ka psychologist. (ESL)