NAUSWAG ang giatangang exhibition bout tali sa boxing legends nga sila si Mike Tyson ug Roy Jones Jr. nga gikatakda unta karong Septiyembre, 2020.
Pinaagi sa Twitter, gipahibalo ni Ryan O’Hara sa Ring Magazine nga ang away sa duha ka Hall of Fame fighters ipahigayon na karong Nobiyembre, 2020.
Wala mohatag si O’Hara og dugang mga detalye kon unsa’y rason sa pagkauswag sa away.
Hinuon usa ka kasaligang tinubdan ang mibutyag nga nabalaka ang mga nagpasiugda ning maong away nga maalakanse og dako kon wala’y mga tumatan-aw nga tugotang makasaksi sulod sa venue.
Gituohan nga ang gituyo sa mga nagpasiugda nga iuswag ang away sa pamasin nga masulbad na ang problema sa coronavirus disease 2019 (Covid-19) sa ulahing bahin ning tuiga ug tugotan na ng boxing fans nga makatan-aw sulod sa venue.
Si California Athletic Commission executive director Andy Foster mipamatuod nga ilahang gitugotan ang exhibition bout sa kondisyon nga kinahanglang tumanon ang tanang safety measures nga ilang ipasunod.
Kini taliwala sa kabalaka sa kadaghanan nga adunay ngil-ad nga mahitabo bisan asa nila ni Tyson ug Jones tungod sa ilang pangidaron. Si Tyson nag-edad na og 54 samtang si Jones nag-edad og 51. (ESL)