NAGKADUOL na ang Sugbuanong pro skateboarder nga si Margielyn Didal sa iyang pangandoy nga makatamak sa labing dakong sporting meet sa kalibutan — ang Olympics.
Ang lumad nga taga Lahug, Cebu City anaa sa ika-14 nga puwesto sa women’s street skateboarder world ranking ug kon iya kining mamintinar, hayan masulod na siya sa 2021 Tokyo Olympics diin masubhan ang skateboarding competition.
“I still can’t imagine representing my country and raising the Philippine flag, especially at the Olympics,” sigon ni Didal sa interbyu sa Tokyo 2020.org.
Sa pagkakaron upat pa ka atletang mga Pinoy ang naka-qualify sa matag upat ka mga tuig kompetisyon ug posibling si Didal na ang mosunod kon magpadayon siyang anaa sa world’s Top 20 women’s street skateboarder sa dili pa mahuman ang qualifying window.
Ang Tokyo Olympics ipahigayon unta karong tuiga apan tungod sa hulga sa coronavirus disease 2019 (Covid-19), nakahukom ang Olympic Committee ug ang host Japan nga isibog kini sa sunod tuig.
Sila si Ernest Obiena sa men’s pole vault, Carlos Yulo sa artistic gymnastics, Eumir Marcial sa men’s middleweight sa boxing ug Irish Magno sa women’s flyweight sa boxing mao ang upat ka Pinoy mga atleta nga sulod na sa Summer Games.
Matod ni Didal nga wala damha nga usa ang skateboarding sa gilauman nga makasulod sa Tokyo Olympics kay ang ubang tawo bati man og pagtan-aw sa skateboarders.
“Most people, when they see a skateboarder, they say ‘you don’t have a future there. They are just hanging on the street’. We look dirty because we are trying to land a trick and we get dusty. And now we’re expecting to be in the Olympics,” sigon ni Didal.
“I mean, we’re talking [about the] Olympics actually. It’s a big pressure because you know it’s for your country.”
Si Didal, kinsa 2018 Asian Games ug 2019 Southeast Asian (SEA) Games gold medalist maoy labing unang Pinoy skaterboarder nga misalmot sa global skateboarding events sama sa Street League Skateboarding sa London ug X Games Minneapolis.
Niining tuiga nibulsa pud siya og bronze medal sa Women’s 2020 Tampa Pro Competition.