Tambagi ko Noy Kulas: Buso ni Tiyo

DEAR Noy Kulas,

Maayong adlaw. Tawga lang kog May Ann, taga Cebu City ra ko. Ang akong problema kining akong uyoan sa pag-agawan nga kusog mamuso.

Noy, kining akong uyoan way trabaho ug natsismis nga manggamitay og drugs. Diri sa amoa, natabi ni nga bayran aron mopatay og tawo mao mahadlok ang among pamilya ug mga silingan. Kon mahubog siya, manabi dayon nga mao na ang iyang source sa kwarta nga sayon ra. Pero ang iyang mga igsuon mokatawa ra kay bisan gani uk-ok, mahadlok kuno. Hambog ra kunoy ayo kon mahubog.

Nakabantay ko niya nga lain og tinutokan nako ug siya ang akong gidudahan nga namuso nako three times na pero wa ko mosulti sa akong pamilya kay basin magubot ug duna unyay di maayong mahitabo.

Unsa kaha ang akong maayong buhaton aron mahunong siya? Nahadlok ko kay klaro kaayo siyang drug user ug manghasi pa usahay kon mahubog. Tambagi ko.

MAY ANN

May Ann,

Di na siya makahigayon og buso kon imohang hikawan sa higayon nga makalili. Pananglitan imong usbon ang imong schedule sa pagkaligo. Kanang di ka motultol og oras aron di siya makaatang. Ikaduha, ipanabi nga dunay namuso nimo makatulo na ka mga higayon apan wa ka kaila kon kinsa. Kon moabot niya ning tabia, seguradong magpanagana na siya bisan unsa pa niya kaagresibo sa pagpamuso kay paryente man mo. Kon adlawan siya manglili, mahimo rang pabantay sab nimo sa gawas kinsa nang mamuso kon maligo ka. Chances, magpanagana na siya kay makit-an kon iya ning buhaton.

Laing mahimo ninyo mao ang pagbutang og suga ug CCTV kon maka afford mo aron dunay ebidensya against niya. Dunay mga tawo nga bisan sa taas nang edad peeping Tom gihapon. Hayan, nagkinahanglan sila og psychiatric intervention. Kana kon di sab ni produkto o resulta sa iyang paggamit og illegal drugs nga maka heighten sa sexual desire.

Pag-amping lang gyud, ayaw og kompyansa kay basin unsa nay nasulod sa iyang utok.

NOY KULAS