Libre? Talagsaon ra ni nga serbisyo gikan sa goberno nga ihatag og libre(?) o barato ngadto sa katawhan nga dili makaabot sa bayronon sa mga pribado nga establisemento. Ang Land Tansportation Office Region 7 (LTO-7) pinaagi kang Dir. Victor Emmanuel Caindec nagpahibawo nga ang ilang opisina mopahigayon og pagtudlo sa pagmaneho og sakyanan usa mokuha og lisenysa sa ubos ra nga bayranan.
Matod pa ni Caindec, sa iyang pakighinabi sa prensa, nga mao ni unang’ higayon dinhi sa rehiyon ug dakbayan sa Sugbo nga ang LTO maglusad sa Driver’s Education Center (DEC) aron makatabang sa mokuha og lisensya sa pagmaneho og sakyanan apan di makaabot sa bayronon sa pribado nga driving school.
“Kon dunay giingon nga private driving school, duna say public driving school,” pung pa ni Caindec. Apan, duna ba ni bayad ang iyang giingon nga public driving school ug pila? Matud pa ni Director Caindec, P300 ang bayronon sa DEC. Apan alang kini sa mga timawa ug buotan, dason pa ni Caindec.
Sa samang taho sa The Freeman, ang LTO nakarehistro ug nag-ila na sa 23 ka private driving school dinhi sa dakbayan sa Sugbo. Syaro, sa ingon ani kadaghan nga private driving school naa pa gihapon mga drayber unya way batasan o respeto sa mga balaod ug lagda sa trapiko.
Sa karon nga pamaagi, ang aplikante sa driver’s license kinahanglan nga moagi ug nakahoman na sa gilagda nga 15 ka oras nga pagmaneho sa sakyanan pinaagi sa driving school usa mahatagan sa Practical Driving Course Certificate (PDCC). Kon gibuhat pa unta ni sa mga nangagi nga katuigan, mas daghan unta ang but-an kay sa badlongon nga mga drayber. Kon sa Español pa “mas vale tarde que nunca,” o maayo na lang bisag uwahi na kay sa wala.
Ang LTO miangkon nga ang usa sa mga hinungdan sa disgrasya sa kadalanan mao ang kakuwang sa kadaghanan sa mga drayber sa edukasyon ug kaalam sa balaod ug lagda sa trapiko, labina sa luwasnon nga pagmaneho. Duna koy nahibaw-an nga dunay mga tawo nga nakalukat og lisensya sa pagmaneho apan dili gani makasabot para unsa ang kolor puwa, dalag ug berde sa suga sa trapiko.
Dunay mga di makasabut unsay katuyoan sa puti o dalag nga gipintura nga nagbahig sa dalan.
Manghinaut ta nga magpadayon sa katuigan kining bag-o nga pamaagi sa LTO-7 aron ang sunod nga kaliwat sa mga drayber mga but-an na. Hinuon, duna man gihapon mga abusado ug garboso bisan mga edukado nga drayber.
Angay usab tan-awon og maayo sa LTO kining mga private driving school. Kaniadto, dunay koy gibadlong nga magtutudlo sa private driving school tungod kay wa gitagad ang “Yield sign” sa trapiko. Ang “Yield o Stop Sign”, maoy usa sa mga lagda sa trapiko nga kadaghanan sa mga drayber di motuman labina sa interseksyon nga walay traffic lights.