Labella: Lumolupyo makabuot mogawas o di

Ang mga lumolupyo sa Barangay Guadalupe maoy pahukmon ni Cebu City Mayor Edgardo Labella kon mogawas ba sila o di sa Dominggo.

Kini human nihangyo sa iyang buhatan ang Barangay Council sa Guadalupe nga ipadayon ang ilang gipatuman nga polisiya subay sa barangay resolution niadtong panahon sa enhanced, modified ug general community quarantine diin ang ilang mga residente gidid-an paggawas sa Dominggo.

“In this regard, the undersign, in behalf of the Guadalupe Barangay Council, is requesting your kind office to continue this said implementation of the barangay resolution as it is upon observation, it is welcome and appreciated by the vast majority in the barangay,” tipik sa suwat ni Barangay Kapitan Michael Gacasan.

Apan ang barangay resolution nawagtangan og bili human nipagawas og Executive Order number 86-A si Labella nga nagtugot sa mga quarantine pass holder nga makagawas bisan sa Dominggo, diin sa nakalabay nga kapin sa buwan, way gitugotan nga makagawas sa maong adlaw.

“Kon maoy desire sa mga opisyales ug mga lumolupyo nga dili mogawas, maoy labing maayo nga di sila mogawas. Pero ato silang gitagaan og kagawasan ang mga tawo nga mogawas labi na kon sila mopalit og essential goods ug kadto nga mga tawo nga gustong mosimba,” padayag ni Labella.

Ang amahan sa dakbayan niingon nga kon pilion sa mga tawo sa Guadalupe nga di mogawas subay sa pangangkon sa mga barangay official nga nakagusto ang mga residente sa gipatuman nga polisiya, walay mawagtang kanila.

“Og dili sila mogawas. wala may silot o sanction kay ila man mang freedom nga dili mogawas. Unya para kanako, kana maoy labing maayo kay quarantine pa man kita karon. So. kon ang uban mogawas for essential purposes and going to church, ila na nga katungod kay ato man silang gihatagan og kagawasan,” dugang ni Labella.

Ang Barangay Guadalupe pinangulohan ni Gacasan buot nga makontrolar ang mga tawo sa Guadalupe niining panahon sa GCQ sanglit anaa gihapon ang presensiya sa virus.

Ang Guadalupe usa sa mga dapit sa siyudad nga taas og mga kaso sa coronavirus disease (Covid-19).

Dunay mga dapit niini nga gipaubos sa lockdown tungod sa kataas sa mga kaso sa Covid-19. / PAC