APROBADO na sa konseho sa dakbayan sa Lapu-Lapu ang kapin sa P4 milyunes nga gahin alang sa pagpamalit og ventilators sa Covid-19 patients.
Mao kini ang gikompirmar ni Konsehal Flaviano Hiyas, majority floor leader sa konseho.
Sumala sa konsehal, ang ventilators ipahimutang sa mga tambalanan sa dakbayan nga nag-atiman sa mga pasyente sa Covid-19.
Una nang nihangyo ang kagamhanan sa konseho sa panginahanglan sa ventilators sa padayong pagpakigbatok sa Covid-19 ug kini nakita sa konseho nga gikinahanglan kaayo.
Nanghinaut si Hiyas nga karon nga aduna nay pundo sa pagpalit og mga ekipo nga kinahanglan, matubag na ang suliran sa tambalanan sa dakbayan sa ilang pag-atiman sa mga pasyente sa Covid-19.
“During the start gyud sa Covid I was the one who really stood up in the session and really fight for the purchase of ventilators kay nagbasa man gud ko og news item especially in the US and Italy nga grabe kagamit ang ventilators to those patient nga naglisod ug ginhawa,” matod ni Hiyas.
Gipadayag usab ni Hiyas nga sunod nilang tukion sa konseho mao ang paghatag og pundo nga ipalit og kaugalingong polymerase chain reaction (PCR) testing machine.
Kini aron mas madali na ang pagbasa sa resulta sa swab samples nga Oponganon.
Matod sa konsehal, importante ang naasoyng makina aron mas dali ra nga makuha ang resulta sa gipaubos sa swab test ug mas dali usab ang contact tracing.
Sa pagkakaron, ang dakbaan mag-agad sa resulta sa test nga luwatan sa Vicente Sotto Memorial Medical Center (VSMMC) sa dakbayan sa Sugbo. / GCM