Kaso sa Covid-19 sa Kapulisan sa CV mikunhod na

MOKABAT na lang og 108 ka mga pulis sa Central Visayas (CV) ang positibo sa coronavirus disease 2019 (Covid-19) gikan sa 528 ka mga kaso nga natala sukad sa pagsugod sa pandemiya .

Sa ulahing kalamboan, ang 79 ka mga pulis nga konpirmadong wala nay sakit kagahapon sa buntag, Agusto 10, ug gikatakdang modonar sa ilang blood plasma.

Gilauman nga ang tanang nabilin nga pulis nga positibo sa virus hingpit nang maayo sa sunod semana.

Ang kapulisan nga naayo human nipaubos sa recovery program sa Police Regional Office (PRO) 7 ug kagamhanan sa dakbayan sa Sugbo.

Matod ni Police Brigadier General Albert Ignatius Ferro, direktor sa PRO 7, nga sa mosunod nga mga adlaw, posibling madugangan ang maayo sa naasoy nga sakit.

Lakip sa gipaabot nga maayo mao ang kapin sa 80 ka pulis nga bag-ong recruits.

“We are just waiting kanang trainees. We are just waiting sa ilang result ..” matod ni Ferro.

Sa sunod semana molusad si Ferro og dungang pagkuha sa ilang blood plasma nga ilang idonar sa Department of Health (DOH) alang sa mga pasyente sa Covid-19 nga naa pa sa tambalanan nga

nanginahanglan sa ilang panabang.

Gidasig sa heneral ang mga nakaayo sa Covid- 19 nga mohatag nga libre sa ilang blood plasma aron daghan ang dali nga maayo sa maong virus.

Dason sa heneral nga nagpadayon pa karon ang iyang mga sakop sa pag-imbestigar sa mikatap nga impormasyon labot sa pagpamaligya sa blood plasma.

Matod ni Ferro nga iyang gitahasan ang Criminal Investigation and Detection Group (CIDG) 7 nga mohimo sa imbestigasyon alang sa dinalian nga pagpangita niadtong mibaligya sa ilang dugo sa kanhi nagpositibo sa Covid-19 apan naayo na sa naasoy nga sakit. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph