CEBU City Mayor Edgardo Labella nimando na sa pagpa-release sa tulo ka buwan nga balor sa financial assistance ngadto sa persons with disabilities (PWD).
Ang pagpang-apud-apod sa tag P3,000 nga financial assistance ngadto sa dul-an 12,000 ka mga PWD sugdan karong Sabado Agusto 15, 2020.
Ang P3,000 maoy ilang ayuda gikan sa Abril, Mayo ug Hunyo sanglit wa sila maapil dihang gihatagan og yuda ang kapin 80,000 ka mga senior citizen niadtong Hunyo.
“Ato nang ipanghatag ang PWD nga financial assistance ug atong itunol pinaagi sa pag-adto sa ilang mga balay inabagan sa atong mga barangay officials sugod karong adlaw nga Sabado,” butyag ni Labella.
Ang mayor nangayo og dispensa sa libuan ka mga PWD sa dakbayan sanglit nalangay ang ilang tabang gumikan sa hulga sa coronavirus disease (Covid-19).
Si Labella nagkanayon nga molanat og tulo ngadto sa lima ka adlaw ang distribution.
Ang mga disbursing officer maoy mopahigayon sa house-to-house distribution.
UNSAY ANDAMON
Ang mayor nanawagan sa mga PWD nga magbutang og ngalan gawas sa ilang mga balay aron sayon ang pag-ila kanila.
Mag-andam usab og ballpen para sa pagpirma sa ilang pagdawat sa ayuda uban sa pagsul-ob og face mask.
Si Labella nidugang mga human sa distribution sa PWD, ila na usab nga atimanon ang paghatag sa financial assitance sa mga senior citizen sa Hulyo ug Agusto.
Wa usab mapaspas ang pag-apod-apod sa hinabang sa mga senior citizen agig panagana batok sa Covid-19. / PAC