ANG Cebu City Covid-19 Action Team (CCCAT) nakadakop na og 2,548 ka violators sa general community quarantine (GCQ) gikan Agusto 1 sa dakbayan sa Sugbo.
Kini ang gipadayag ni Raquel Bohol-Arce, pangulo sa Prevention Restoration Order Beautification Enhancement (PROBE) kinsa maoy gitahasan ni Mayor Edgardo Labella pagdisiplina sa violators sa Plaza Independencia.
Niadtong Dominggo, ang CCCAT nakadakop og 272 ka GCQ violators dihang gitugotan ni Labella nga makagawas ang adunay mga quarantine pass human sa kapin usa ka buwan nga gisuspenso sa mayor ang paggawas sa Dominggo.
Base sa record sa CCCAT, ang 272 ka dinakpan maoy ikalima nga labing daghan og violators sa siyam ka adlaw gikan niadtong Agusto 1 hangtod sa Agusto 9.
Ang labing daghan nga nadakpan niadtong Agusto 1 diin niabot og 550 ang ilang gi-aresto.
Niadtong Agusto 2, nakadakop sila og 321 ka individual, Agusto 3, 259 samtang 308 niadtong Agusto 4. Sa Agusto 5, nakadakop sila og 267, Agusto 6, 276 , Agusto 7, 161 samtang 134 niadtong Agusto 8 nga maoy labing ubos nga gidaghanon sa mga nangadakpan.
Ang pangulo sa Probe niawhag sa mga Sugbuanon nga kon aduna silay plano nga mogawas apan walay quarantine pass o wala motukma sa adlaw nga gitugot sa City Hall, dili nalang nila idayon sanglit sa higayon nga sila madakpan, nagtangag kini og bug-at nga penalty. / PAC