KAPIN sa tunga sa bilyon ka pesos nga balor sa illegal nga drugas ang nasakmit sa kapulisan sa Central Visayas bisan sa quarantine tungod sa coronavirus disease (Covid-19).
Samtang 14 ka mga drug personality ang napatay sa police operations.
Kini nahitabo sud sa unom ka mga buwan sukad namunoan si Police Brigadier General Albert Ignatius Ferro sa Police Regional Office (PRO) 7.
Sa talaan sa PRO 7, sila nakasakmit og 56.003 sa kilo sa gituohang shabu nga mobalor og sa P380,826,656 base sa Dangerous Drugs Board (DDB).
Nakaibot usab silag kapin sa usa ka toneladang punoan sa marijuana nga adunay kantidad nga P128 million.
Sa ilang 2, 642 ka anti illegal drug operations, 14 ka mga drug personality ang ilang napatay.
Sa mao nga gidaghanon sa anti drug operations, 2,103 niini buy-bust, 39 search warrant, 79 ka warrants of arrest, 18 ka pagpangibot sa marijuana, 312 ka police operations ug 61 ka checkpoints. / AYB