NEGATIBO sa coronavirus disease (Covid-19) si Cebu Governor Gwendolyn Garcia.
Kini maoy gipahibawo sa Kagamhanan sa Lalawigan sa Sugbo, Agusto 10, 2020.
Si Garcia mipaubos sa polymerase chain reaction (PCR) test sa Agusto 6, human sa iyang message of hope sa ika-451 nga kasumaran sa pagkatukod sa Lalawigan sa Sugbo.
Sa maong adlaw, gianunsyo usab sa gobernador nga nakigbatok usab sa coronavirus disease ang iyang igsuon nga si Barili Mayor Marlon Garcia.
Pipila kini ka adlaw human nilusad ang magsuon sa All-Terrain Vehicle (ATV) adventure sa nahisgutang lungsod sa Agusto 2.
Sa Biyernes, Agusto 7, gipahibaw sa Provincial Health Office (PHO) nga negatibo ang resulta sa PCR test.
Hinungdan nga nakapadayon siya sa paglusad sa tourism activities sa kaislahan sa Camotes sa Agusto 8, kauban ang Provincial Task Force.
Gihimakak na ni Garcia mga duha ka semana ang nakalabay nga nataptan siya sa Covid-19.
Sukwahi kini sa gipakatap nga mga taho nga anaa siya sa usa ka pribadong tambalanan tungod kay nagpositibo sa sakit.
Giklaro ni Garcia nga na-busy siya sa pagpahigayon og mga tigom alang sa hingpit nga pagbukas sa turismo sa lalawigan ubos na sa modified general community quarantine (MGCQ) status. / ANV