HUBO nga mga hulagway ug sex video sa mga tinun-an gikatahong gipamaligya aron duna silay pangbayad sa online classes.
Ang klase sa tuig tigtungha 2020-2021 buksan karong Agusto 24, apan way gitugot nga face-to-face. Tungod niini ang kapulisan hugot nga nag-monitor sa Central Visayas, labina sa dakbayan sa Sugbo.
Ang Sugbo usa sa mga dapit sa nasod nga dunay taas nga mga kaso sa cyber pornography base sa kadaghan sa nasikop sa police operations.
Si Police Lt. Col. Artemio Ricabo, deputy chief sa Regional Anti-Cyber Crime Unit (Racu) 7 nga nahinabi sa Superbalita Cebu, nagkanayon nga sa pagkakaron, ilang gipaubos sa monitoring sa Central Visayas kining maong impormasyon.
Nigawas ang mga report sa kaulohan kabahin sa mga tinun-an nga mibaligya sa ilang mga hulagway nga hubo sila ug sex videos ngadto sa mga langyaw nga buyer aron ang kita ibayad sa online classes.
Sumala pa ni Ricabo nga sila nasubo sa maong kalambuan kay ang mga tinun-an mihimog illegal nga kalihukan tungod sa coronavirus disease aron dunay ikabayad sa online classes.
Tungod sa hulga sa Covid-19, ang kagamhanan nagdili sa face-to-face nga klase hangtod nga duna nay bakunang moabot sa nasod nga madapat sa mga magtutudlo ug tinun-an.
Ang numero unong paagi mao ang online nga pagtudlo, labina sa pribadong mga tunghaan.
Wa nila isalikway ang posibilidad nga dunay nihimo dinhi sa rehiyon, apan wa pa silay nasakpan.
Kanunay sila nga mihimog cyber patrolling aron masubay ang naghimog illegal online.
“Ako pahimangno, advise lang sa mga ginikanan, guardians, dunay silay anak, o pag-umangkon monitoron nila, kay luoy pud ning mga bataa, modiskarte aron maka kwarta ning panahon sa pandemic pero illegal,” dugang ni Ricabo.
Gipadayag niini nga ang kawad-on o kalinghod pa sa panghunahuna sa mga tinun-an gipahimudsan.
Ilabi na karong panahon sa pandemic nga lisod kaayo, daghang way mga trabaho.
Sa pagkakaron ang online libel maoy labing daghan nilang natala, gisundan sa on-line scam ug threat. /