(The Song of the Supreme Lord: The Divisions of Faith, Chapter 17:1-28)
NGANANG Ardyun, O Krisna, nanu ing kabilyan ning ninumang e mamintu karing pamanalakaran ning kasulatan dapot sasamba ya kapamilatan ning keyang pamisip-isip?
Ati yu king kayapan, king lusuk panamdam o king kelambelwan.
Ngana ning Kakatas-katasang Panginwan, agpang karing paralan ning makalabwad a kalikasan atanggap ning mikatawang kaladwa, ing kasalpantayanan ning ninu man malyaring atlu ing kauryan da-kayapan, lusuk panamdam at kelambelwan.
Ngeni pakirandaman mu ing dikil kareti.
Agpang king karinan ning ninuman lalam ding miyayaliwang paralan ning kalikasan, ninuman darasan na ing mepiling kauryan ning kasalpantayan.
Ing mabibye lelangan mayayaus yang ati king mesabing kasalpantayanan agpang karing paralan nang tinggap.
Deng tau ati keng paralan ning kayapan sasamban da la ring diwata; detang ati king paralan ning lusuk panamdam sasamban da la ring ryablu; at ding ati king paralan ning kelambelwan sasamban da la ring maglage at ding askediwa.
Deng ninumang daralan saring pamagdimut at parusang e makausuk karing kasulatan, daraptan la para king dangalan, pangamakasarili, kapangaybugan at pangagapus, a tutulak ning lusuk panamdam at panasakitan da la ring kasangakapan ning katawan da at ning Punkaladwang makatuknang kilub makilala la anting ryablu.
Agyang ing pamangan a pisusulwan ding sabla atlu ing kauryan, agpang karing atlung paralan ning kalikasan. Antita mu naman kareng daun, pamagdimut at pamirake. Makirandam ka, at Kanakung ipasyag keka ing pamiwali-aliwa ring atlu.
Ding pamangan king paralan ning kayapan daragdagan na ing kekaban ning bye, pasugyan na ing kaninumang pamandatila at bibye sikanan, kabulasan, ligaya at kaganapan. Deting makapanese pamangan mayumu la, masabo, makataba at malasa.
Ding pamangan a binang mapait, binang maslam, malat, manginis dila, malangi at maparas, pibuburyan da la ring taung ati king paralan ning lusuk panamdam.
Deng pamangang deti magbunga lang kasakitan, lugma at kasalunan.
Ding pamangang lulutung migit king atlung oras bayu kanan a alang lasa, mabangnas, bilasa, malalaso na't e malinis, ila pin ding pibuburyan da ring taung ati king paralan ning kelambelwan.
Karing ampang, itang daun a depatan agpang king katungkulan at batas ding kasulatan, at alang panayang galal, ati king kalikasan ning kayapan.
Dapot itang daun a depatan para king makalabwad a wakas o pakinabang o depatang kisnang kaparatutan, pauli ning dangalan, ati king kalikasan ning lusuk panamdam, O pun ding sablang Barata.
At itang daun a depatan salungat king utus ding kasulatan, a nung nu alang pamangang mibubudbudan alang dalit migagale, at alang bayad mipapagkalub karing babaylan, at itang alang kapanaligan-ing daung ita ati king kalikasan ning kelambelwan.
Ing pamagdimut king katawan mabibilang kareti: pamanyamba king Kakataskatasang panginwan, ding bramana, ing talaturung pangdiwa, at makatas mengari karing ibpa at indu. Kalinisan, kayanunan, e pamakipangalunya at kelang-kapanasakitan kapagdimutan na la naman ning katawan.
Kapagdimutan king pamangamanu mabibilang king pamagsalitang makatutwananan at mapakinabangan at king pamangilag king pamagsalitang makapandalpak.
Ninuman dapat na lang gagale ring Dalitbelwan parati.
Layun ing kapanatagan, kanayanunan, katikdyan, pamanampat king sarili at kasugyan ning pamisip ila ring kapagdimutan ning isip.
Deting atlungtuklip a kapagdimutan, nung daraptan ding tau a e magnasang numabang pangsarili da nung e bang pamatulan ing Kakataskatasang Panginwan, ati lu king paralan ning kayapan.
Deng paratut a pamagsalbat at pamagdimut a daraptan bang manikwang galang, dangalan at kapanyamban mibabansagan lang ati king paralan ning lusuk panamdam.
E la matatag layun e pang-kapilanman.
At detang pamagsalbat at pamagdimut a daraptan ding bolang kapamilatan ning masyaskad a pamamarusa king sarili, o bang siran o sugatan la ring aliwa, mayayaus lang ati king paralan ning kelambelwan.
Ing ampang a pagkalub pauli ning tungkulan, king makatud a panaun at nangan, king maulagang tau, at alang panayang kapalit, mituturing a pamirake king paralan ning kayapan.
Dapot ing pamirake ating panayang mapilang kapalit, o ating pagnasang mabungang kapalyaryan, o king mapanyumbat a gana, masasabing ati king paralan ning lusuk panamdam.
At ing pamirake depatan king e makatud a nangan at panaun at pigkalub karing taung alang pamigalang at ating kamarinayan ya pin ing pamirake king paralan ning kelambelwan.
Magmula king kamumumulan ning pamaglalang, ding atlung kulit-om tat sat -- megamit na la bang ipasyag ya ing Kakataskatasang Katutwan [Braman].
Simbitla da la ring bramana kabang gagale lang dalit ding Belwan at kabang malilyari ing pamidaun, para king ikaganap ning Kakataskatasan.
Inya sa't ding magpakapaymbabo darapat manampang lang pamidaun, pamirake, at pamagpakasakit, magmula parati king om, bang dasnan ya ing Kakataskatasan.
Ninu man dapat gawang pamidaun, pamagpakasakit, at pamirake ati yu ing amanung tat.
Ing sangkan niting makapaymbabo pamirapat ya pin ing bang mibulus king makalabwad a pangapaluput.
Ing Katutwang Tibubus ya pin ing parasan ning makaparikil a kasuywan, at pakilala ne iti ning amanung sat. Deting dapat ding pamidaun, pamagpakasakit at pamirake, tune king dalise kalikasan, daraptan la bang pamatulan ya ing Kakataskatasang Tau, O anak nang Prita.
Dapot ding daun, pamagdimut, at pamirake depat alang kapanaligan king Kakataskatasan e la pang-alang-angga, O anak nang Prita, king nu makananu la man reti pigmasusyan.
Awsan la reting pansamantala m la mu at ala lang ulaga king kasalungsungan at king tutuking bye.
***
PIGAMPA: Ing Kapisik manalig yang misubling pasibayu ing lagablab ning legwan ning Kapampangan kapamilatan ning pamipasigla king keyang Kalinangan -- ding keyang dalit, kawatasan, amlat at miyayaliwang kapaglalangan.
PARASAN: Pagnasan na niting ing paralan ning panyulat at sablang dake ning Kalinangan tamu a telukyan ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan.
Malyaring sumulat king garciakragi@yahoo.com para karing kutang o munikala.