DAGHAN ang suliran karon nga gisagubang sa ahensya sa panglawas nga mao ang Department of Health (DOH) ug Philippine Health Insurance Corporation (PhilHealth) sa nasud.
Ang DOH di episyente ang ilang serbisyo mao nga pakyas sila sa pagsumpo sa makamatay nga Covid-19, samtang ang Philhealth nalambigit usab sa kurapsyon.
Ang DOH giingon nga misuway sa pagdoktor sa ihap sa mga naayo sa virus aron ipasiatab sa tibuok kalibutan nga sila ang labing epektibo nga gobyerno sa pagsumpo sa pandemya, samtang Philhealth giingon nga misuway sa pagsuyop sa binilyon nga salapi sa ahensya.
Apan ang DOH nagkanayon nga nasayop lamang sila sa pagbutang og numero sa report, samtang ang Philhealth nagkanayon nga walay nahitabo nga kurapsyon. Ambot lang kung kinsa ang nagsulti nila sa tinuod nga misteryo sa ilang ahensya.
Sa nahitabo, daw nakapuntos si Senadora Imee Marcos sanglit iyang gibatikos ang DOH sa paggamit sa recovery report aron tabunan ang taas nga ihap sa mga natakbuyan sa Covid-19 nga mga health care workers sa dul-an lima ka buwan pagpatuman sa community quarantine.
Sa iyang gipadalang suwat pahayag sa media, giingoni niya: "Tila pakunsuwelo de bobo ang nilabas na ulat ng DOH na 90% ng health care workers ang naka-recover mula sa sakit. Hindi ito ang sagot sa mataas na bilang ng tinamaan ng sakit sa kanilang hanay, kumpara sa ibang mga bansa."
"Bagamat mas marami ang kabuuang kaso ng infected sa Italya at US kesa sa ating bansa, kailangan namang mahinto ang dumaraming bilang ng mga health care workers na tinatamaan ng sakit sa atin," dugang pa niya.
Suma niya, niadto lamang Abril gideklara sa World Health Organization ang Pilipinas isip "outlier" o pinakagrabe ang pagdagsang sa ihap sa kaso sa natakbuyan nga mga health care workers.
Dugang pa niya, mismo ang datos sa DOH sa buwan sa Hunyo nagkanayon nga misaka sa 15 porsyento ang kinatibuk-ang kaso sa infection rate sa atong health care workers.
Sa pagkapili sa senadora nga mahimong kabahin conference committee ug gitahasan nga hiusahon ang bersyon sa Senado ug Kamara sa Bayanihan To Recover As One Act, gipamugos niya nga mahinungdanon nga maapilang direktiba ni Pangulong Duterte nga hatagan og 10,000 piso na allowance ang tanang healthcare workers sa nasud.
Tungod niini, giduso niya ang Senate Bill 1644 kun Healthcare Frontline Workers Welfare Bill nga nagtinguha nga automatikong makabaton ang mga healthcare workers og P10,000 nga allowance ug hazard pay panahon sa pandemya o public health emergency.
Kung maaprubahan kini, di na magtinguha nga moresayn sa ilang trabaho ang mga health workers tungod sa risgo sa kinabuhi ug sa kagamay sa ilang sweldo.
Kamatuoran niini, daghan ang mga health workers sa Southern Philippines Medical Center ang miresayn sa miaging bulan tungod sa risgo ug di maayong benepisyo nga wala nakita sa ahensya sa panglawas.