BUGTONG kahibalo ug pagsunod sa katawhan diha sa mga health protocols ang makaputol sa pagtakod sa coronavirus disease (Covid-19) diha sa komunidad.
Si Davao City Mayor Sara Duterte-Carpio pintok nga namulong niini atol sa regular nga programa sa siyudad sa kahanginan sa 87.5 DCDR FM, Davao niadtong Lunes.
"Nangutana ko sa kanang medical specialist gyud, how do we cut local transmission? Dili lang slow down, but cut it. Ni-ingon ang doctor, mask, distancing ug hand washing," tipik sa giingon sa mayor.
Kini ra gayod ang bugtong mga pamaagi, apan pipila sa mga tawo, gahi'g ulo, maong sa ilang barangay, paspas nga mitaas ang ihap sa natakdan.
Gani niadto sa wala pa napaubos sa hard lockdown ang Barangay 23-C, giangkon man gyod sa kapitan niini nga dunay iyang mga residente nga gahi'g ulo nga miresulta sa pagtaas sa ihap sa mga natakbuyan.
Ang pagtuman sa katawhan sa mga gipasunod sa otoridad maoy bugtong makaundang sa local transmission ning Covid-19.
Motuman kita, di magginahi'g ulo.