DIGOS CITY -- Epektibo alas 5 sa hapon niadtong Lunes, Agosto 10, gilibkas na sa mayor sa dakbayan ang gideklarang "total lockdown" sa Barangay Kapatagan.
Nasayran nga adlaw'ng Biyernes, Agosto 8, gipailawom ni Mayor Josef Cagas ang lockdown sa maong barangay, nag-unang destinasyon sa turismo ug tinubdan sa dakong suplay sa gulay sa rehiyon ug ubang parte sa nasud.
Ang mando nahisubay sa giingong dunay exposure ang lugar sa usa ka pasyente sa Covid-19 mao nga gihimo ang disinfection ug paglusad og contact tracing.
Way bisan kinsa ang gitugtan nga makasulod ug gawas sa maong barangay, gawas sa mga sakop sa Inter-Agency Task Force Covid-19, mga awtoridad ug uban pang awtorisadong personahe.
Gumikan sa lockdown, apektado ang mga establisemento sanglit nanirado gawas sa mga botika ug awtorisadong tindahan.
Apan bisan giwagtang na sa mayor ang lockdown, nagpabilin ang mando nga tumanon ang gilatid nga protocol ilawom sa modified general community quarantine (MGCQ) nga giimplementar sa dakbayan subay sa deklarasyon sa National Task Force on Covid-19.
Tungod sa maong katikaran, gikalipay sa ubang komprador og gulay ang pagwagtang sa lockdown human nakaapekto kini sa ilang panginabuhian. (Orlando B. Dinoy)