GIBALOT og pagmahay ang dagway sa usa ka 27 anyos nga lalaki kinsa nasikop atol sa entrapment operation sa San Pedro Police Station alas 3 sa hapon niadtong Lunes sud sa Diaz Mall, Bolton Street, Davao City.
Giposasan sud sa iyang gitrabahoan ang suspek nga si Lolito Licomes Tenebro, computer technician, taga Maco, Davao De Oro ug temporaryo nga nagpuyo sa S.I.R Phase 1, Matina.
Sumala sa San Pedro PNP nga duna silay nadawat nga reklamo batok sa suspek hinungdan nga gipailawom nila kini sa test-buy.
Dihang nag-positibo nga mohimo og diay og mga peke nga medical certificate, rapid test clearance, barangay certificate ug travel authority ang suspek, gilayong gilusad ang operasyon.
Usa ka nagtakuban nga awtoridad ang misulay sa pagpahimo og rapid test clearance diin dihang nahuman na ang paghimo bugti sa kantidad sa salapi, gilayon kining giposasan.
Nakuha sa posisyon sa dinakpan ang mga ebidensiya nga maoy gitipigan karon sa kapulisan aron mapresenta ngadto sa korte sa pagpasaka og kaso batok sa suspek. (Jeepy P. Compio)