SUPERBALITA CEBU

Diputado: Face shield maayo unta og libre kini

Cuentas Claras

LISOD kaayo ang sitwasyon ni Bohol Gov. Art Yap sa Bohol. Gusto niya nga dalion ang panahon sa kwarantinas gikan sa 14 ka adlaw ngadto sa 5 na lang ka adlaw kon mogawas nga magnegatibo sa polymerase chain reaction (PCR) test.

Ang rason niya tungod kay paigo na ang maong panahon nga maseguro nga dili na makatakod ang maong tawo. Sa maong paagi, madali usab nga makabangon ang probinsiya ug molambo na.

Apan ang Bohol Medical Society (BMS) ug ang Philippine College of Physicians (PCP) supak niini.

Matod pa nila, dili pa maseguro nga luwas na ang pagkuyanap sa Covid-19 sulod lang sa 5 ka adlaw, angay nga hulaton usa og pipila pa ka mga adlaw aron maseguro gyod nga dili na makatakod.

Nabahin ang mga katawhan, dunay miuyon ug dunay misupak.

Unsa may angay buhaton kon mao kini ang sitwasyon?

* * *

Daghan ang nagtuo nga angay ayuhon usa kini og tuki kay dunay bug-at nga gibasehan ang masig-ka-panig.

Dungay bug-at nga rason si Gov. Yap. Dunay bug-at sab nga rason ang mga doktor, mao gani kini hinungdan nga misupak sila.

Angay lang nga mitingan na sab kini aron maayo ang moresulta.

Dili maayo nga padak-on ang garbo, padak-on ang kainit sa ulo ug labi na gyod nga dili maayo magtawganay og mga dili maayo nga pulong sama sa bogo o unsa pa.

* * *

Daghan na karon ang nangandam alang sa umaabot nga klase, ilabi na kadtong apil sa online class.

Kon online class, angay lang nga dunay computer, laptop o android nga cellphone. Ug duna sab internet connection.

Dili mahimo kon wala kining duha.

Gani, bisan kon dunay internet connection, di sab mahimo kon hinay o weak ang signal.

Kon hinay ang signal, way makita o di maklaro ang isulti sa maestro o maestra.

Siyempre, kon ingon ani ang sitwasyon, dili kaayo maayo ang moresulta sa leksiyon.

* * *

Maayo lang kini nga sitwasyon sa mga siyudad o mga lungsod nga naa sa poblacion.

Apan sa mga eskuylahan nga layo, labi na kadtong tua sa bukid nga walay signal sa cellphone, wa gyoy mahimo bisan gamay.

Mahitabo nga gyod tingali kadtong pasiaw nga mokatkat sa lubi aron lang makakuha og signal.

* * *

Walay lalis nga maayo ang katuyoan sa uban nga mga LGUs nga himuon nga patakaran ang pagsul-ob og face shield gawas pa sa gigamit nga mask.

Kon panagang lang sa Covid ang hisgotan, dako na kaayo kini nga tabang nga malikayan ang pagtakod sa kagaw. Labi na kon ubanan kini sa paghugas pirmi sa kamot.

Apan ang nakalisod ani kay paliton kining face shield. Dili kini libre mao nga kinahanglan ang tanang tawo dunay kwarta para ipalit niini.

Mao kini ang reklamo sa kadaghanan.

Dugang kabug-at kini labi na kay daghan pa ang walay trabaho. Ang pinaka-una nga gisagubang sa katawhan karon mao ang pagkaon, Ulahi na ang pundo para palit sa face shield.

Kon mahimo unta, libre ang face shield aron dili na mabug-atan pa ang mga katawhan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph