NIADTONG Abril, Mayo, Hunyo ug Hulyo ning tuiga, grabe ang ilang mga pagtamay ug pagbiaybiay kang Cebu City Mayor Edgardo Labella gumikan sa kataas sa kaso sa Covid-19 sa dakbayan nga ilang gipasangil sa kahinay sa lakang sa mayor.
Taas nga higayon nga nahimong numero uno ang siyudad sa Sugbo sa Covid-19 cases ikompara sa Metro Manila.
Karon ang Cebu City milampos sa kampanya apan pipila lang sa mga tawo ang nagpasalamat ni Labella.
Grabe ang pag-ubos sa kaso sa Covid-19 sa Cebu City sa pagkakaron sukad gipaubos sa pagbalik sa general community quarantine (GCQ).
Ang Cebu City Government milampos sa kampanya sa pagtambayayong sa Inter Agency Task Force ( IATF ) ug frontliners.
Dako og natampo ang pagbutang sa pipila ka mga lugar sa granular lockdown. Ang paglimit sa lakaw pinaagi sa pag-isyu og quarantine pass ug estriktong checkpoints nga gidumala sa PNP ug AFP.
Ug karon ang Cebu City wa na masud sa mga lugar nga nagka problema sa pagduma sa Covid-19.
Tungod niini, atong malauman nga ikalipay ni Presidente Rodrigo Duterte ang grabing pagtibugsok sa kaso sa Covis-19 sa Cebu City.
Gilauman na ipahibawo karong Agusto 15 nga ang Cebu City ipaubos na sa modified general community quarantine (MGCQ).
LUNGSOD SA BOLJOON
Sama sa Cebu City, miubos sab ang kaso sa Covid-19 sa probinsya sa Sugbo tungod sa estriktong polisiya ni Gobernador Gwendolyn Garcia.
Ang lungsod sa Boljoon hugot nga mipatuman ug misunod sa mando ni Garcia.
Bisan Covid-free ang Boljoon, gipahibawo ni Mayor Merlou Derama sa interview sa Agila nga agpadayon ang ilang pagpanghatag og bugas sa katawhan.
Matud ni Derama , way gipili ang ilang gitagaan ug ang tanan makadawat og bugas.
Usa kini ka maayong ehemplo ang gihimo sa mayor. Ila sab nga giabagan ang Department of Social Welfare and Development (DSWD) alang sa pagpanghatag sa ikaduhang hugna sa SAP. Email: efrenlonzon71@gmail.com o text sa 09235562777