SUPERBALITA CEBU

Editoryal: Kudos sa SAF!

Editorial Cartoon by John Gilbert Manantan

DAKO og natabang ang 151 ka mga sakop sa Special Action Force (SAF) sa Philippine National Police (PNP) nga gipadala sa dakbayan sa Sugbo gikan sa kaulohan niadtong Hunyo 27, 2020 atol sa pagsaka og pag-ayo sa kaso sa Covid-19 sa dakbayan.

Kudos sa kaestrikto sa SAF human nagbunga ang ilang hugot nga pagpatuman sa quarantine protocol. Way pili. Way lipudlipod sa pagnakop. Bisan dunay mitumaw nga reklamo apan wala kini nila panungbalinga. Gikahadlokan ug nagpahumok sa mga gahi og ulo.

Dili tiaw ang ilang tabang sa seguridad sa dakbayan sa panahon nga napiangan og pwersa ang Cebu City Police Office (CCPO) dihang dunay daghang natakboyan og Covid-19. Napagan ang uban sa lockdown sa pipila ka presinto.

Human sa ilang usa ka buwan ug 14 ka adlaw, ang SAF mibalik sa kaulohan kagabii, Agusto 11, aron moabag na sab sa National Capital Region Police Office (NCRPO) human sa pagsaka og balik sa kaso sa Covid-19.

Si Presidente Rodrigo Duterte nimando niadtong Agusto 4 sa pagbalik sa modified enhanced community quarantine (MECQ) sa National Capital Region ug mga lalawigan sa Laguna, Cavite, Rizal ug Bulacan gikan sa general community quarantine (GCQ) tungod sa gikabalak-ang gidaghhanon sa kaso sa Covid-19.

Ang health sector hugot nga nipasidaan sa Presidente sa nag-ung-ong nga krisis sa serbisyo sa panglawas. Nabalaka sa pagluag sa kuwarentina ug nanaghan ang mga tawo sa kadalanan.

Ang SAF ug ubang awtoridad dako og mahimo sa pagkontrolar o paglimit sa paggawas sa katawhan. Dili kini sayon tungod sa kadaghan sa kagahi og ulo ug isip frontliners, risgo sa sakit.

Takos ang 151 ka SAF gipasidunggan ug pagpasalamat sa mga opisyal sa dakbayan nunot sa pagminos sa Covid-19. Usa ka hamubo nga programa nga gihimo sa Barangay Tisa gym kagahapon, Agusto 11. Kudos kaninyo!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph