SUPERBALITA CEBU

Coastal highway pinaagi sa reclamation project sulbad sa trapiko sa Lapu

MOA: Sila si Lapu-Lapu City Mayor Junard Chan (naglingkod, wala) ug Francis Chua sa Mactan Bluewaters Development Corp. (naglingkod, tuo) nagpirmahay sa memorandum of undesrtanding (MOA) niadtong Agusto 7, 2020 alang sa katukoran sa usa ka reclamation project nga lagbasan sa usa ka coastal highway. Gipaabot nga mopaluag kini sa trapiko nga dakong suliran sa siyudad. (Alan Tangcawan)

NAPANGLANTAWAN nga mahatagan na unya og solusyon ang suliran sa trapiko sa Dakbayan sa Lapu-Lapu nga way magasto ang kagamhanan.

Kini human nga gilagdaan sa Kagamhanan ang memorandum of agreement (MOA) tali sa Mactan Bluewater Development Corp. (MBDC) niadtong Agusto 7, 2020.

Ubos sa kasabutan, ang MBDC na ang mo-reclaim sa 203 ka ektaryang baybayon sa Barangay Punta Engaño ug Canjulao.

Sa maong proyekto, ipahimutang ang sa 30 metros nga gilapdon sa karsada nga maoy maghatag og solusyon unya sa trapiko sa mga nag-unang kadalanan sa dakbayan.

Mao kini ang mahimong alternatibong agianan sa mga motorista sa dakbayan nga taudtaud nang nag-antos sa inadlaw nga trapiko.

Niadtong wa pa ang coronavirus pandemic, talagsa ra ang adlaw nga di maghuot ang trapiko sa siyudad sa bisan asa nga dapit, labina sa duha ka taytayan sa Mactan.

Ang ikatulong taytayan nga nagdugtong sa Cordova ug Dakbayan sa Sugbo padayon pang gitrabaho.

Ang ikaupat nga taytayan gipundohan na ug manukad sa norteng bahin sa siyudad ug mainland Cebu.

Sa kinatibuk-ang 203 ka ektaryang i-reclaim, 52 porsyento niini iya na sa Kagamhanan samtang 48 porsyento iya sa MBDC.

Pabarugon sa mao nga reclamation project mao ang socialized housing project alang sa informal settlers nga anha tukoron sa bahin sa Siyudad.

Giproklamar na kaniadto pa ni kanhi Presidente Gloria-Macapagal Arroyo kinsa ang informal settlers.

Adunay 24 ka ektarya sa Canjulao nga gitagana alang niini.

“Magamit nato ni. Silay mo-develop (developer), silay mopabarog, silay moabuno. Ila tanan at no cost sa city government,” matod ni Chan.

Ang kinatibuk-ang reclamation project aduna unyay mga luna alang sa turismo, industriya, commercial ug park.

Plano usab sa kagamhanan nga adunay ibutang nga boardwalk ilawom sa duha ka mga taytayan sa Mandaue ug Mactan.

Kon kini madayon, usa na usab kini sa dugang mga attraction sa Siyudad nga nabuhi usab sa turismo nga apektado kaayo karon tungod sa coranavirus pandemic.

Posible usab ang pagtukod og bag-ong city hall sa i-reclaim nga luna, dugang ni Chan, apan wa pa kini katinuan.

Aprobado na hinuon ang naasoyng proyekto sa Philippine Reclamation Authority (PRA).

Gitagaan na usab si Chan og pagtugot sa Konseho sa Dakbayan nga molagda sa MOA hinungdan nga nadayon ang kalihukan.

Posibleng magsugod ang pagtrabaho niini sa uwahing bahin karong tuiga.

“Or ang atong share property pwedi nato ibaligya o i-develop,” matod ni Chan. (GCM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph