WA GIDAYON sa Cebu City Government ang pag-serve sa closure order batok sa usa ka hotel sa dan Escario, Dakbayan sa Sugbo aron paghatag kanila og kahigayunan nga ma-follow-up ang ilang gi-apply nga pagtugot sa Department of Health (DOH) 7 nga mamahimo silang isolation facility.
Bisan pa niini, gi-lockdown ang hotel tungod sa kaso sa Covid sugod sa Lunes sa gabii, Agusto 10, 2020.
Matod ni manlalaban Jareed Limquiaco, pangu sa Business Permit and Licensing Division sa Cebu City Hall, nga ila untang i-serve ang closure order human ilang nasubay sa contact tracing nga dunay pipila ka mga pasyente nga positibo sa coronavirus disease (Covid-19) nga gipapuyo sa maong hotel nga wa masayod ang Siyudad.
Dugang ni Limquiaco nga ang management nipasabot kanila nga nag-apply na sila sa Department of Health (DOH) 7 alang sa ilang accreditation nga mamahimong quarantine facility, apan wa pay pagtugot gikan sa ahensya. Wa sila mosulti kon kanus-a sila ni-apply.
Sa Martes, Agusto 11, gipaabot sa Kagamhanan sa Siyudad ang desisyon sa DOH 7.
Kon ang DOH mo-accredit sa hotel nga mamahimong isolation facility, ang upat ka mga pasyente nga nasubay sa contact tracers sa Siyudad magpabilin sa sulod hangtod nga sila magnegatibo sa umaabot nga swab tests.
Moabot og 14 ka mga adlaw ang quarantine, apan wa masayri kanus-a nagsugod pagpuyo sa hotel.
Samtang ipaubos sa swab tests ang tanang mga trabahante sa hotel kutob sa mga naka close contact sa upat.
Ang contact tracing personnel sa Police Regional Office 7 (PRO) 7 nisusi sa hotel aron pagsubay sa close contacts sa upat ka mga pasyente.
Gisuwayan sa Superbalita Cebu pagkuha ang habig sa management, apan nidumili sila sa pagluwat og pamahayag. (BBT)