SUGOD sa Martes, Agusto 11, 2020, ang mga Ceres bus sa temporaryo nga North Bus Terminal i-park na ngadto sa Tambayan Lacion Food Park, sa Barangay Pitogo, lungsod sa Consolacion.
Ang temporaryong North Bus Terminal nahimutang sa Sta. Lucia Town Square sukad niadtong gipaubos na sa general community quarantine (GCQ) ang Probinsya sa Sugbo niadtong Mayo.
Ang pagbalhin sa terminal gihimo human niadtong Agusto 3, 2020, wa masunod ang health protocol labi na ang social distancing ug pagpahiluna sa mga pasahero aron maabot sa ilang tagsa-tagsa ka destinasyon.
Sa post ni Consolacion Municipal Mayor Joannes Alegado sa opisyal nga Facebook page sa lungsod, siya niingon nga gikasabutan na nila sa administrative manager sa Vallacar Transit, operator sa Ceres Bus, nga si Joelito Cabanes nga adto na mag-park ang mga bus sa Tambayan.
Mitugot si Cabanes tungod kay di sab siya gusto nga makabalda sa dagan sa trapiko ang ilang mga bus.
Sigon sab sa post nga gikasabutan na kini sa una nga adto sa Liloan ang parkinganan sa mga bus.
Apan, gihangop ra sab ni Cabanes ang kalambuan nga sa Tambayan na ang terminal.
Alang niya nga mas luwas ang mga pasahero ug ang ilang nga bus driver tungod kya di na sila sa kilid sa karsada mag-park. Dul-an ngadto sa 90 ka mga bus nga adunay walo ka rota ang nagdagan sa Consolacion paingon sa mga kasikbit nga mga lokalidad.
Matod ni Cabanes nga adunay mobyahe gikan sa lungsod sa Consolacion ngadto sa I.T. park agi sa Barangay Canduman, Mandaue City.
Adunay mobyahe usab para Countrymall sa Dakbayan sa Sugbo nga moagi sa Barangay Cabangcalan, Mandaue City ug dunay moagi sab sa A.S Fortuna nga dalan. /
Dunay mobyahe usab ngadto sa Robinsons Galleria sa North Reclatimation Area sa Dakbayan sa Sugbo, Parkmall sa Dakbayan sa Mandaue agi sa Highland.
Duha ka bus ang mobyahe sa syudad sa Lapu-Lapu diin moadto kini sa Marigondon ug Mactan New Town.
Samtang dunay biyahe usab padulong sa Cebu City hall agi sa Talamban.