PADAYON gihapon sa pag-train ang Kagamhanan sa Dakbayan sa Mandaue sa bag-ong contact tracers karong semanaha.
Gisugdan ang training niadtong Dominggo, Agusto 11, 2020, diin 37 ka mga bag-ong na-hire nga contact tracers ang ningtambong.
Sa Martes, Agusto 11, aduna say training nga gipahigayon alang sa contact tracers sa barangay ug aduna say mga bag-ong contact tracers nga naapil sa maong training.
Matod ni Dr. Debra Catulong, sa Covid-19 response sa Mandaue CIty Health Office, nga giapil nalang sab nila ang daan na nga contact tracers sa barangay aron mapahinumdoman sila sa mga angay buhaton kon mag contact tracing.
Alang sab sa mga bag-o nga contact tracers, aron sab mahibawo sila sa importansya sa contact tracing ug aron maandam sila sa di pa sila ma-assign sa barangay.
Matod ni Catulong nga importante ang contact tracing aron maputol dayon ang pagkatag sa coronavirus disease (Covid-19) ug ma-isolate dayon ang mga indibidwal nga posibleng positibo sa virus.
Sa laing pakighinabi, si Atty. August Lizer Malate, nangulo sa Emergency Operations Center, niingon nga gawas sa “basic skills” nga kinahanglan mahibaw-an sa contact tracers, ang “commitment” sab sa mga contact tracers.
MOSERBISYO
Matod ni Malate nga gitutokan nila ang pasalig sa contact tracers nga adunay kasingkasing sa pagserbisyo.
Di gusto si Malate nga sa tunga tunga sa pakigkumbati sa Covid-19 tungod sa karisgo sa trabaho, mobiya dayon ang ilang gi-hire.
Nahinabi sa Superbalita Cebu ang duha ka bag-ong contact tracers nga ni-gradwar sa kurso nga Criminology kinsa miboluntaryo nga mu-apply sa maong trabaho bisan paman sa risgo nga ilang maatubang.
Si Steven Jay Sinadjan, 21, taga Barangay Alang-Alang, Mandaue City, fresh graduate sa kursong Criminology, niingon nga bisan kon supak ang iyang pamilya sa iyang pag-apply, padayon gihapon siya tungod kay alang kaniya dako kini og tabang di lang sa iyang pamilya, apan alang sab sa Dakbayan sa Mandaue.
Una kini nga trabaho ni Sinadjan sukad siya mi-graduate ug andam siya nga moatubang sa bisan unsang hagit sa maong trabaho.
Si Junivie Gutang, 26, taga Barangay Guizo sa mao nga siyudad, nigradwar sab sa kursong Criminology, niingon nga bisan kon boluntaryo siya nga mi-apply sa maong trabaho, di gihapon malikayan nga makulbaan siya labi na nga dako ang posibilidad nga mataptan sab sila.
Iyang gipaningkamutan ang pagkalma ug dobleng pag-amping lang ang iyang buhaton aron di sila mataptan.
Gani, ang duha mapasalamaton sab nga dakbayan sa Mandaue mihatag nila og kapuy-an aron di una sila mouli sa ilaha ug malayo sa risgo ang ilang pamilya.
Isip mga nigradwar sa kursong Criminology, sigon sa duha nga di ra layo sa ilang kurso ang maong trabaho kay gitun-an na nila ang surveillance skills. (KFD)