SAF mibiya na sa Sugbo

BALIK NCR: Luwan sa barko sa Philippine Coastguard BRP Gabriela Silang ang mga SAF diha sa Pier 1, dakbayan sa Sugbo. (Amper Campaña)
BALIK NCR: Luwan sa barko sa Philippine Coastguard BRP Gabriela Silang ang mga SAF diha sa Pier 1, dakbayan sa Sugbo. (Amper Campaña)

NIPAULI na sa kaulohan ang 151 ka mga sakop sa Special Action Force (SAF) nga gipadala sa dakbayan sa Sugbo isip abag sa dihang gipatuman ang enhanced community quarantine (ECQ),

Sila si Cebu City Mayor Edgardo Labella ug Police Brigadier General Albert Ignatius Ferro, director sa Police Regional Office (PRO7) ang nipasalamat sa serbisyo sa SAF sud sa usa ka buwan ug 14 ka adlaw.

Nanamilit niadtong Agosto 11 ang maong elite unit sa PNP tungod kay ibalik na sila sa National Capital Region Police Office aron didto na usab sila ipakatap tungod sa pagtaas sa kaso sa coronavirus disease sa Metro Manila.

Niabot ang SAF niadtong Hunyo 27 sa dihang gipaubos sa ECQ ang Cebu City.

Nipasalamat si Ferro sa dakong natabang sa SAF sa pagpatuman sa community quarantine protocol ilabi na sa mga barangay nga daghan ang kaso sa Covid-19 tungod kay gidid-an ang makagawas sa ilang kabalayan kon walay facemask ug quarantine pass.

Bisan pa man sa pagbiya na sa SAF masaligon si Ferro sa nga makontrolar sa kapulisan ang pagpatuman sa health protocols sanglit anaa man ang presensiya sa crisis response battalion nga moabot sa 600 ka personnel.

Si Environment Secretary Roy Cimatu ang inter-agency task force overseer nakadayeg sa mga sakop sa SAF nga gipadala dinhi sa Sugbo tungod kay usa sila sa hinungdan nga mi-ubos ang gidaghanon sa kaso sa Covid sukad sila nangabot.

Iyang gihulagway ang maong mga police mga professional sa ilang trabaho bisan pa man sa pipila ka reklamo nga estrikto ra may labot sa pagpatuman sa tanang protocol.

Sa 151 ka sakop sa SAF nga gipadala dinhi sa Sugbo walay bisan usa kanila ang natakbuyan sa coronavirus disease 2019 ug gihulagway sila ni General Ferro nga pulos himsog.

Samtang ang Cebu City Government pinaagi ni Labella mopasidungog sa SAF atol unya sa 84th Charter Day celebration sa Pebrero 24, 2021.

“Cebu City is preparing for the recognition during our Cebu City Charter Day, all of those who have extended their help will be acknowledged and recognized by the City Government of Cebu,” matod pa sa mayor.

Si Labella sa iyang bahin nagkanayon nga dili makalimtan sa mga Sugbuanon ang natampo sa SAF pagpakunhod sa kaso sa Covid. (AYB, PAC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph