‘WeTrace’ ipatuman karong adlawa

KARONG adlawa, Miyerkules, Agosto 12 maoy unang adlaw sa pagpatuman sa “WeTrace.ph” sa Lalawigan sa Sugbo pinasikad sa executive order ni Gobernador Gwendolyn Garcia.

Gikinahanglan nga morehistro online kadtong mga nanarbaho sa dakbayan sa Sugbo diha sa maong website aron nga ka-isyuhan og worker’s pass gikan sa lokal nga kagamhanan.

“Pero og wala pa sila makakuha they will continue to process it, dili lang sila modiretso og sulod diri kay pangita-an sila though continue ra gihapon ang process,” matod ni Garcia.

Alang sa mga adunay Android o IOS mobile phones, mahimo nga morehistro online.

Apan alang sa mga walay Android phones, modangop ngadto sa munisipyo aron mahatagan og worker’s pass.

REQUIREMENTS

Gikinahanglan nga andamon ang company ID, worker’s certificate, updated nga medical certificate nga may petsa gikan sa Hulyo 15 hangtod sa Agosto ug ID picture.

Ang lalawigan sa Sugbo gipaubos na sa modified general community quarantine (MGCQ) gawas lang sa syudad sa Talisay, lungsod sa Minglanilla ug Consolacion nga gipaubos sa general community quarantine (GCQ).

Bisan paman sa nagkalain-lain nga community quarantine status sa matag local government untis (LGU), gikinahanglan nga mosubay ang mga Sugboanon sa nahisgutan nga kamandoan.

Pagpasabot ni Garcia nga ang tumong ug tuyo niini mao ang pagsusi sa rota sa mga empleyado, pagsiguro nga kon mosulod kini sa dakbayan sa Sugbo dili kini magsuroy-suroy sama sa pag-adto og mall diin posibleng makakuha sa coronavirus disease (covid-19).

PAGSUBAY

Alang sa mga empleyado nga nakapasar sa application, gikinahanglan nga mag-on ang Bluetooth diha sa ilang mobile phones aron masubay ang point to point nga destinasyon sa empleyado.

Sa maong paagi, masubay nga nanukad sa balay lahos ngadto sa trabahoan ug vice versa.

Nahukman sa probinsiya sa pagmugna sa maong tracing system aron sayon ang pagsubay niadtong virus carrier ug aron sab kapugngan ang pagsaka sa mga nagpositibo sa Covid.

Sa kadtong adunay tuyo sa Cebu City apan dili mga trabahante gikinahanglan nga adunay travel pass gikan sa ilang hingtungdang LGU.

“Naa naman tay existing order ana, dili man kaha sila motrabaho sa Cebu City ngano mangutana pa man sila? Naa man tay previous executive order ana nga kon mo-cross sila issuehan sila og travel vehicle pass ang presumption naa silay travel pass. Pero kon gusto sila motrabaho sa Cebu City lahi nana nga istoryaha,” matod ni Garcia. (ANV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph