DUNAY pipila ka mga mipadayag sa ilang reaksiyon kalabot sa niagi natong kolum diin atong gihisgutan ang panahom ni Kevin Durant sa Brooklyn Nets.
Sa iyang pangagpas, gipanagna ni Durant nga ang Milwaukee Bucks ug ang Los Angeles Clippers maoy mag-abot sa NBA Finals.
Ingon niya, nga sa maong best-of-seven series ang Clippers nga gibituonan ni Kawhi Leonard maoy mopatigbabaw aron langkaton ang ilang unang titulo.
Sa ato pa, wa makit-i ni Durant ang Los Angeles Lakers ni LeBron James ug ni Anthony Davis nga makapatong sa finals, butang nga nasukwahi sa gituohan sa uban ilabi na sa mga Lakers fans.
Ang kanhi sportswriter nga si Dale Rosa (aka Scot Pilgrim) nagkanayon: Lakers vs. Bucks sa finals na sir. Kung naka notice mo bati kaayo ug duwa ang Lakers after na lock nila ang #1 spot sa West. Di kaayo halata ilang load management ug pag experiment sa rotation. Wala naman sad sila angay daugon pa sa remaining games nila. Huwat na lang mag sugod ang playoffs. Sa East, Hayag na mag abot sa ECF ang Bucks ug Toronto after na injured si Simmons sa Sixers.
Gregy Canete Magdadaro (DySS reporter ug Superbalita correspondent): Kung akoy pangutan-on Rockets ug Raptors man boss.
Efren Lonzon (komentarista/kolumnista): Clippers ug Raptros na my friend.
Manolita Silva: D consistent ang Lakers, Junmigs.
Rolando Adarna: Layo pa na ang duwa. Ari na sila mangisug semifinal.
Nestor Repollo Alforque: Di ba may chamba? basin diay.
Richard Giganti: Ayày diko sugot ana...lakerland rules
Sila maoy pipila lang sa mga nipadayag sa tagsatagsa nila ka panahom ning nagkainit ug nakakulbahinam na nga season.
Pero ang naghatag og dugang kahinam ning nadelatar nga season mao kining kombati sa upat ka mga teams nga nag-ilog sa katapusan ug ikawalong luna alang sa playoffs sa Western Conference.
Kon atong ipahaom sa sitwasyon karon, walay social distancing kining maong mga team kay sikit man kaayo ang ilang standing.
Ang gitumbok mao kining no. 8 nga Memphis Grizzlies, no. 9 nga Portland TrailBlazers, no. 10 Phoenix Suns ug no. 11 nga mao ang San Antonio Spurs.
Kon kinsa ang makakompleto sa top 8 sa Western Conference kini hayag-hayag nga mahibaw-an karong adlawa.
Ang nakasiguro na og luna sa West, mao ang Lakers, Clippers, Denver Nuggets, Houston Rockets, Oklahoma City Thunder, Utah Jazz ug Dallas Mavericks.
Sa East wala nay prolema, kay ang Orlando Magic mao na may nakasiguro sa no. 8 slot uban ang Bucks, Raptors, Boston Celtics, Miami Heat, Indiana Pacers, Phildelphia Sixers, ug Brooklyn Nets.
* * *
Oooppss...Dili halayo ang posibilidad nga di mahinayon kining away sa mga edaran na nga sila si kanhi world heavyweight champion Mike Tyson, 54, ug former three division world champ,Roy Jones Jr. , 51.
Ang duha ka mga Hall of Famer fighters gikatakda unta nga magsangka alang sa usa ka exhibition match karong Septiyembre didto sa California apan, matod pa, dunay mga komplikasyon ug temporaryo kining giuswag ngadto sa Nobyembre.
Wa man tuod ibutyag kon unsa gyuy numero unong rason nganong gi-postponed ang maong away, pero matod pa sa tinubdan, nga mura og walay interesadong motan-aw niini sa pay-per-view ug wa sab makakuha og sponsors.
Sa sitwasyon gud karon nga ubos sa pandemya, dili man patan-awan ang boxing, so mokita lang ang promoter pinaagi sa sponsor ug pay-per-view.
Nag-usik-usik lang og kuwarta ang promoter kon mosugal siya ani.
Mao nay giingon nga nilabay na ang ilang panahon ug di na mahitabo nga mabalik pa. jun.migallen22@gmail.com