ANG Sugbuanong karateka nga si Orencio James “OJ” de los Santos makita sa iyang kahanas diin iyang gilupig ang World No. 1 Eduardo Garcia sa Portugal sa Athletes’ E-Tournament niadtong Martes sa hapon, Agosto 10.
Usa ka kulbahinam nga panapos ang gipakita ni World No. 2 de los Santos sa championship round diin nilabaw lang siya 0.1 puntos sa iyang total 25 puntos batok sa 24.9 ni Garcia aron ibulsa ang individual men’s seniors nga titulo.
Mao kini ang unang higayon nga gilupig ni de los Santos si Garcia sa ilang ikatulo nga panag-abot sa championship round. Matod niya usa kini ka tam-is nga kadaogan. Napilde si de los Santos sa championship round sa SportsData E-Tournament World Series niadtong Mayo ug Adidas Karate World Open Series #2 sayo ning buwana.
Iyang Japanese coach ni suggest kaniya nga gamiton ang iyang paborito nga kata style nga Unsu. Tuod man nagbunga gyud kini kay iya na gyung nakuha ang gold medal sa Athlete’s E-Tournament nga gi organisar sa Russia.
Usa ang karatedo nga nagpadayon taliwala sa (Covid-19) pandemic tungod ang kata style niini pwede man duwaon online. Ang ubang sports nga giduwa online mao ang chess, taekwondo ug dance sports.
Ang two-time Southeast Asian (SEA) Games bronze medalist niapil na og 13 ka online tournament sukad nagsugod ang lockdown sa Pilipinas. Nakabulsa na siyag upat ka gold, duha ka silver ug usa ka bronze.
Matod ni de los Santos nga tungod niining duwaa mas nidako iyang kadasig nga adunay tsansa maapsan sa ranking ang No. 1 sa world. (RSC)