I WILL surely miss a good neighbor!” matod ni Major James Jurado, usa ka retiradong sundalo sa Philippine Army, nga silingan ni Romy nga usa ka CPA. Misulod si Major James sa balay nga giabangan ni Romy ning sayong kahapunon samtang si Romy nanghipos sa iyang mga gamit. Duol duha ka tuig na silang silingan sa tiguwang sundalo nga biyudo. Nakalitan ang tiguwang pagkamatikod niya nga mamalhin sila si Romy.
“Di na gyud kapugngan, Major, nga mamalhin mig puyo. Ganahan unta ko dinhi, apan di man mi komportable,” matod ni Romy.
“Unsa may hinungdan?” ni Major James.
“Taas kaayong sugilanon,” ni Romy.
Nahatutok ang tiguwang sa iyang higala.
Nakauyon unta si Romy sa palibot sa balay nga ilang giabangan. Daghan og mga tanom. Bugnaw ang palibot. Mora og probinsya ang kamingaw. Unya mahitungod sa seguridad, bisan dili serado ang geyt ang ‘compund’ nga may tulo ka balay sa baryo Samisti ning dakbayan, wa mabaniog nga may nangawat. Duha ra sa tulo ka balay ang gipaabangan. Gilibutan og mga ‘hollow block’ nga koral ang mga balay. Ang tulo ka balay gipanag-iya sa magtiayong Edgar ug Sonia. Ang nag-una nga balay dikit sa karsada sa barangay maoy gipuy-an sa magtiayon. Sa luyo sa ilang balay nahimutang ang duha nga giabangan nilang Major James ug Romy. Ang kang Major James nahimutang dapit sa kasadpan; ang kang Romy dapit sa silangan.
Nagkasuod si Major James ug si Romy kay puro sila hilig og kanta-kanta. May mga ‘sound system’ sila. Sa makauna lag hagad kon asa sila manganta. Mga nindot sab silag tingog. Madasigon silang manganta kay si Mira, kapikas ni Romy, maoy tigluto nilag sumsuman sa giinom nilang beer. Sila na lang si Romy ug si Mira ang nag-uban pagpuyo sa balay. Ang duha nila ka anak puro na nangaminyo. Ug ‘semi-retired’ na pod si Romy sa iyang propesyon. Wa na mag-apas nga manarbaho gyud og tudo, kay padalhan man silag alawans sa ilang mga anak nga puro na propesyonal ug dagkog kita. Apan sa ilang katiguwangon nangita gayud silag komportable nga kapuy-an.
“Mora man god mig nailad sa among pagpuyo dinhi,” malumo nga pulong ni Romy.
“Ngano man?” ni Major James.
“Una nakong duha ka pangutana kang Edgar, gitubag niyag bakak,” ni Romy.
“Ha? Unsa god diay?” ni Major James nga nagpanglingi sa balay sa tag-iya.
“Nangutana ko kon wa bay problema sa ‘drainage’ ug sa kasilyas. Ni Edgar pa, wala. Maong midayon mig puyo dinhi. Unya dangtag tulo ka semana nalunopan dayon ang sawog. Nangabasa ang mga ‘baffle’ sa akong sound system. Unya nabara ang kasilyas. Pait kaayo among kahimtang nga sige og sugwak ang inidoro. Kon moreklamo mi, moingon lang sila nga ‘mao na man gyud na!” tug-an ni Romy.
Nakapanglingo-lingo si Major James.
“Well, Major, at least I met a good friend and neighbor while living here. Busa, mag-kontakay lang ta. Kon mingawon ka sa akong tingog, just call me up,” ni Romy. Gilamano niya ang tiguwang ug gibinlan og tarheta.
(KATAPUSAN)