PAGBUTO sa coronavirus disease (Covid 19) niadtong Pebrero, gimando dayon sa mga health official ang pagsul-ob og face mask kay maoy proteksiyon batok ning maong balatian gumikan kay airborne disease o kanang makuha gikan sa hangin. Apil sa gimando ang pagpanghunaw ug paggamit og alcohol. Gumikan kay in-demand man ang face masks ug alcohol niadtong higayona, nag-shortage sa maong mga produkto.
Mi-ingon dayon ang mga health officials nga dili kaayo kinahanglanon nga magsul-od og face mask kay dili airborne ang Covid 19. Motakod lang kini pinaagi sa motuasik nga laway gikan sa tawo nga natakbuyan. Apan karon, ang nag-unang panagang sa virus mao ang face mask, handwashing, alcohol ug social distancing.
Apan dili pa gyud diay igo ang face mask kay pasul-ubon na pod ang mga tawo og face shield, kanang tabon sa entiro nawong nga i-apil ang mga mata kay posibling anha mosulod usab sa mata ang kagaw. Ang Department of Transportation (DOTr) pinaagi sa attached agency niini, ang Land Transportation Franchising and Regulatory Board (LTFRB), mipagawas og kamanduan nga sugod karong Agusto 15, ang drivers, conductors ug mga pasahero sa mga public transportation gikinahanglan magsul-ob og face mask ug face shield. Ang mga pasahero nga dili magsul-ob, di pasakyon ug ang drivers ug conductors nga dili magsul-ob dakpon, multahan.
Unya ang design sa face shield gikinahanglan nga aprobado sa Inter-agency Task Force for the Management of Emerging Infectious Disease (IATF). Daghan ang mi-angal gumikan kay additional gastos na pod na. Mokabat sa P300 ang balor sa prescribed face shield. Asa man kuno og ipalit ang uban nga maglisud man gani intawon pagpalit og face mask.
Tinuod uy, maluoy ta sa uban gumikan kay daghan ang dili maka-afford ani. Sayon ra na paliton sa uban apan lisud pod sa uban labi pa kay daghan ang nawad-an og trabaho ug panginabuhian. Maglisud man gani og pagkaon kana pang face shield. Pero mao lagi pod. Asa man ang atong palabihon? Di ba ang atong kaluwasan sa panglawas labi pa kay dili nato makita kining atong kaaway.?Sunod ani mag-personal protective equipment (PPE) na tang tanan. (bobbygnalzaro@gmail.com)