DAGHAN tingali ang nangalipay human nipahibawo ang Russia nga duna na silay narehistrong bakuna batok sa coronavirus disease (Covid-19) nga gihulagway ni Presidente Vladimir Putin nga luwas ug epektibo.
Apan segun sa World Health Organization (WHO), ang Sputnik 5, ngan sa bakuna nga gama sa Russia, naa pa sa phase 1 sa human trial. Ang trial dunay tulo ka phases. Gikinahanglan sa usa ka tambal nga malabang ang phase 3 aron kini masegurong epektibo ug luwas.
Ang bakuna sa Russia nalakip sa 26 ka mga tambal nga naa na sa unang stage sa human trial.
Ikalipay unta kini nato kay ang mao nga bakuna gitanyag ni Putin sa Pilipinas samtang ang embahada sa mao nga nasod nipahibawo kang Mayor Edgardo Labella nga andam silang mopasawo kanato niini.
Apan di usab maayong magdali-dali ang Pilipinas kay matod pa sa WHO, naa pa sa phase 1 sa human trial ang bakuna. Sa ato pa, gikinahanglan ang paglabang ini sa phases 2 ug 3.
Daghang mga sayantipiko sa Russia ug ubang dapit sa kalibutan nabalaka sa pagdali-dali ning mao nga bakuna.
Ang labing maayong mabuhat sa Pilipinas mao ang pagsalmot sa human trial sa Russia ubos sa kondisyon nga kon makapasar kini sa evaluation sa WHO, himuon ang Pilipinas nga usa sa mga prayoridad nga nasud nga baligyaan sa bakuna sa mas kubos nga presyo itandi sa mga nasod nga wa mosalmot sa programa.
Di maayong magdali-dali ang nasod sa pagpalit og bakuna tungod lang kay desperado na nga mahibalik sa normal ang kahimtang sa nasod ug makabangon na ang ekonomiyang nagusbat og maayo sa coronavirus pandemic.
Di pa baya dugay ang nahitabo sa kontrobersiya sa Dengvaxia. Nakaplagan man gud nga ang Denvaxia maayo lang niadtong nakaagi na og dengue fever, apan makapadoble sa kakuyaw niadtong wa pa. Pwerte intawong hadluka sa mga ginikanan nga bisan unsang bakuna, di na sila magpatusok pa sa ilang anak.