CEBUANA artist ug negusyante, Maria Victoria “Bambi” Beltran, gidakop sa mga sakop sa Regional Anti-Cyber Crime Unit (Racu) 7, alas 9:30 sa Miyerkules sa buntag, Agusto 12, 2020, sud iyang buhatan sa Kukuk’s Nest sa Gorordo Avenue, Barangay Camputhaw, Dakbayan sa Sugbo.
Si Police Colonel Marlo Aquino Castillo, pangulo sa Racu 7, niingon nga si Beltran gidakop base sa warrant of arrest sa kasong cyber libel nga giisyu ni Cebu City Regional Trial Court (RTC) Branch 11 Judge Ramon Daomillas pinetsahan og Hulyo 21, 2020.
Gibutyag ni Castillo nga ang korte mitugot nga makapiyansa og P10,000 si Beltran sa kasong cyberlibel ubos sa Republic Act 10175 kun Cyber Crime Prevention Act of 2012.
Sumala ni Castillo, ang kaso gipasaka sa private complainant nga si April Cande Dequito diin nagsugod sa wa nila pagkasinabot nila sa baruganan sa same sex marriage ug nagkalalis sa social media.
Laing gireklamo mao sila si Charisse Mari Fonacier ug Minnette Esther Lou Villaver.
Si Beltran, sa pakighinabi sa Superbalita Cebu, niingon nga ang post sa social nahitabo niadtong Agusto 2019.
Wa siya masayod nga gipasakaan na sila og kaso ni Dequito tungod kay wa siya makadawat og summon aron pagpatubag ug giklaro niya nga igo ra siyang ni-react sa usa ka post sa Facebook
Nakapiyansa si Beltran ug nakabiya sa korte mga alas 12 pasado sa Miyerkules sa udto.
Matod ni Beltran nga maayo ang pagtratar sa kapulisan kaniya. (GPL)