Delos Reyes: Kurapsyon, gisaad nga paphaon

SA DAGAN sa panahon, hilabihan kadaghan sa katawhang nag-antus tungod wala nay pagkaon sa ilang panimalay.

Sakit alang sa usa ka ginikanan nga maminaw sa hilak sa imong anak kay gigutom; dili unta mahitabo kung lamang makagawas aron manarbaho kay sa gamay nga sweldo masiguro gyod ang pagkaon bisan lisud ang panahon.

Kung magdugay pa, dili ikahulagway unsay dangatan sa atong nasud kay wala na'y kwarta matud ni President Rodrigo Duterte, hubas na ang panudlanan sa gobyerno aron i-ayuda sa katawhan.

Sa miagi nga mga bulan, ang presidente nagsulti nga kaya sa gobyerno hatagan tanang katawhan sa nasud panahon sa lockdown tungod sa pandemya sa Covid-19.

Sa pag-apud-apod sa hinabang, nahitabo ang kaguliyang kay daghan ang nagsulti nga wala sila giapil sa listahan samtang ang uban nga haruhay ang kahimtang gihatagan, tungod suod sa tiglista ug duol sa dughan sa kapitan.

Mga kamatuoran kini nga ang virus sa kurapsyon mikuyanap na hangtud sa pinaka-ubos nga hut-ong sa atong katilingban. Mahipus pa kaha kini ni President Digong ang iyang gisaad sa katawhang Pinoy nga undangon ang kurapsyon?

Sa mga opisyal sa Philhealth, mitukar dayon ang sakit sa mga kiriwan, nagpa-confine sa mga tambalanan human gitaral sa senado ug gituki tinuod ba nga sila nakig-kunsabo aron hakpon ang bilyon nga kwarta sa PhilHealth, pundo sa mga kabus panahon nga sila dad-on sa tambalanan kon maglain ang pamati sa kalawasan.

Ilang gibayaran sa matinud-anon ang kontribusyon sa PhilHealth, giuna kay sa ubang panginahanglan sa panimalay. Miawop ang kahayag alang kanila, karon sila nagasinggit sama sa uban panahon sa eclipse nga "balik ang kahayag" kay nagtoo nga gitukob sa bakunawa ang bulan. Ang kwartang gikawkaw mabalik pa ba kaha?

Unsaun nalang kon madayonan ug unya matigok kining mga tawhana, kinsa man ang manubag sa kadaut nga ilang nabuhat? Unta sa madali makasugod na ang imbistigasyon ug mapahamtangan na og silot kung mamatud-an, imbarguhon ang ilang mga kabtangan, yawat nalang dunay tipik sa kinawkaw nga kwarta ang mabalik alang sa katawhan.

Kalooy sa mga OFW nga dili makagawas sa nasud kung dili makabayad sa ilang paggikan kay mahimong babag sa paggawas, mobayad nalang bisan dili nila matagamtam ang serbisyo sa PhilHealth kay wala didto sa mga nasud nga ilang adtuan.

Kanus-a pa kaha mahimong tinuod nga gawasnon ang mga Pinoy sa kurapsyon? Daghan nang presidente ang misaad nga putlon ang kurapsyon, kadaghanan kanila mipanaw na, ang kurapsyon naghitak pa.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph