DIGOS CITY -- Wa pa'y matudlong suspek ang kapulisan kung kinsa ang nag-itsa og granada ug nibusikad sa atubangan sa balay sa usa ka negusyante sa Purok Waling-Waling, Abella Subdivision, Barangay Zone 1, ning dakbayan alas 3:50 sa sayong kabuntagon, Martes, Agosto 11, 2020.
Gibutyag ni Lieutenant Colonel Vici Anthony Tababa, hepe sa Digos City Police Station, nga nahitabo ang pagbusikad sa balay ni Billy Jhay Abne, 43, minyo.
Si Tababa naghulagway nga ang fragmentation grenade mitugpa sa atop sa balay ug miresulta sa pagkaangol sa 7 anyos nga bata ug ni Lanja Devibar, 32.
Daling nakaresponde ang mga personahe sa City Disaster Risk Reduction and Management Center (CDRRMC) diin gidala ang mga samaron ngadto sa Llanos Hospital ug padayon pang gitambalan.
Sa gihimong imbestigasyon sa mga sakop sa Scene of the Crime Operatives ug Explosive Ordnance Division sa crime scene, narekober ang safety lever ug safety pin sa nibusikad nga ekslosibo ug gipailawom na sa pagsusi.
Samtang, giasoy sa usa ka testigong si alyas May nga nadunggan niya ang usa ka motorsiklo nga miagi sa balay sa ilang silingan ug human ang pipila ka segundos milanog na ang kusog kaayong buto.
Sa bahin ni Barangay Kapitan Edgar Davo, gitataw niini nga nakuhaan og footage sa closed circuit television (CCTV) camera ang suspek nga miitsa og granada sa balay ug kini maoy gitutokan karon sa imbestigasyon sa mga awtoridad.
"So far, sa akong nahibaw-an, naa daw nag-rent diri nga mga personnel sa atong AFP (Armed Forces of the Philippines) but I don't know unsa na ka tinuod basta ang atong nahibal-an karon nihimo og imbestigasyon ang atong mga awtoridad," asoy ni Davo.
Gibutyag sab ni Davo nga adunay mga nadawat nga reklamo ang barangay kalabot sa kasaba sa mga sakyanan sa maong balay sanglit usa kini ka shop diin daghang ang mga ginapaayo.
Gumikan sa nahitabo, gimando na sab ni Mayor Josef Cagas ngadto sa kapulisan nga palawman ang intelligence monitoring aron masikop dayon ang mga suspek.