SUPERBALITA CEBU

Mag-agaw nakuhaan og P7.4M nga shabu; labing dako sukad sa Abril

BISAN COVID: Ang mag-agaw nga Michael Cavan ug Felix Nisnisan nakuhaan og kapin sa usa ka kilong shabu taliwa sa pagpatuman sa quarantine ning panahon sa coronavirus pandemic. (Benjie B. Talisic)

KAPIN sa usa ka kilo nga shabu ang nasakmit sa duha ka managlahi nga mga buy-bust sa Cebu City Police Office (CCPO) sa Martes sa gabii, Agusto 11, 2020.

Tulo ang nasikop, duha niini nakuhaan P7.4 million nga balor sa gituohang sa anti-drug operation nga gilusad sa City Intelligence Unit (CIU) ug Drug Enforcement Unit (DEU) sa Parian Police Station sa mga alas 9 sa Martes sa gabii.

Labing dako kining drug haul sa kapulisan sukad niadtong Abril.

Si Police Major Randy Caballes, pangu sa CIU maoy nangu sa buy-bust nga nisangko sa pagkasikop sa manag-agaw nga Michael Cavan, 42, taga Sityo Esco ug Felix Nisnisan, 34, taga sityo Eyha, Barangay Guadalupe sa Siyudad sa sugbo.

Nasakmit atol sa buy-bust ang kapin usa ka kilo nga shabu nga dunay balor nga P7.4 milyones base sa Dangerous Drugs Board (DDB) value.

Si Police Colonel Josefino Ligan, officer-in-charge sa CCPO nga nahinabi sa Superbalita Cebu, niingon nga sila si Cavan ug Nisnisan makonsiderar nga mga high value inidividual tungod sa mga nakuha nga drugas.

Dugang ni Ligan nga si Cavan nakagawas gikan sa Cebu City Jail niadto lang Mayo ning tuiga ug nibalik sa pagpamaligya og drugas.

Sa monitoring sa CIU, sila si Cavan ug Nisnisan way hunong sa ilang pagbaligya og shabu bisan pa ning quarantine tungod sa hulga sa coronavirus disease (Covid-19).

“Mangita gyud na sila og pamaagi bisan paman sa pagpatuman sa ECQ ug MECQ hangtud nga ni GCQ na ta, apan kining nadakpan, mga pulis ra gyud ang ilang bantayan,” matod ni Ligan.

Dugang ni Ligan nga duha ka mga semanang gipanid-an ang mag-agaw ug dihang nakompirmar, gipatuman ang buy-bust.

Si Cavan niingon nga sa korte na niya tubagon ang tanan dihang gikuhaan og pamahayag sa Superbalita Cebu.

Samtang duha ka oras ang milabay, nadakpan sa mga operatiba sa Parian Police Station ang gikatahapang drug pusher nga si Junrey Rosello, 39, lumolupyo sa Sityo Santo Niño, Barangay T.Padilla ning siyudad.

Si Rosello nga kanhi seaman nasakmitan og shabu nga balor og kapin sa P40,000. (BBT)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph