TEMPORARYO nga gipahunong ang operasyon o biyahe sa mga pasahero sa Bato Matiao Port sa lungsod sa Samboan, amihanang Sugbo, sugod Agusto 12 nga molanat og duha ka mga semana.
Kini alang sa pagpugong sa pagkatap sa kagaw sa coronavirus disease (Covid-19) sa pantalan human ang usa ka security guard nakatakod og upat ka mga tawo.
Sa iyang Executive Order No. 36, si Mayor Emerito Calderon nisuspenso sa biyahe sa mga pasahero gikan ug paingon sa Isla sa Negros.
Hinuon magpadayon ang operasyon sa cargo alang sa paghatod sa mga deliveries.
"The risk of Covid-19 infection is getting nearer and bigger as Samboan port being the only one in the whole Province of Cebu which remained open for passengers since the pandemic started. Hence, a magnet of all LSI coming home to the rest of Region 7 & 6. Now, it is time to temporarily close," matod sa mayor.
Sa kinatibuk-an, ang lungsod sa Samboan nakatala na og 10 ka mga positibobg kaso sa Covid-19.
Apan sa Agusto 11, gipahibawo sa lungsod nga napun-an og upat ka mga kaso sa Covid ang lungsod tungod sa security guard sa Matiao port.
Gipasabot usab sa lokal nga kagamhanan nga puno na ang isolation facilities sa lungsod tungod sa pagpauli sa locally stranded individuals (LSI).
Nipuno pa ang nagkadaghan nga mga pasahero nga mopauli paingon sa Negros nga kasamtangan nga na stranded sa Matiao port human nga pipila kanila di na dawaton sa tagsa-tagsa niini ka mga lugar.
Hinungdan nga sagad sa maong mga pasahero na stranded na sulod sa usa ka buwan, hinuon ang uban kanila nangita og kapasilongan sa Dakbayan sa Sugbo.
Gipahibaw sa lungsod nga kon madugangan pa ang kaso sa pantalan, posibleng madugangan ang adlaw sa pagsuspenso sa byahe.
Nipasalig ang lokal nga kagamhanan sa pagbuhat sa lakang pagpugong sa kagaw nagsubay sa protocol sa Department of Health (DOH). (ANV)