NAKATALA og usa ka patay sa coronavirus disease (Covid-19) ang Cagayan de Oro human nakabsan sa kinabuhi ang usa ka 73-anyos nga babae pasado alas 12 sa udto Martes, Agosto 11, 2020.
Ang babae usa ka residente sa Upper Carmen ug usa sa tulo ka mga bag-ong nakumpirma nga mga kaso sa Covid-19 sa dakbayan.
Matud ni City Health Office Epidemiologist Dr. Joselito Retuya, ang babae, kinsa adunay home address sa usa ka munisipyo sa Bukidnon, mibiyahe sa nahisgutang lugar kaniadtong Marso kauban ang iyang duha ka mga apo. Nibalik siya sa Cagayan de Oro sa Hulyo.
Ang 73-anyos nga babae nakasinati og hilanat Agosto 9 ug aduna syay ubo Agosto 10. Gidala siya sa JR Borja General Hospital kadlawon sa Agosto 11 human siya nakasinati og kalisod sa pagginhawa.
Gi-swab siya sa maong hospital kadlawon sa Agosto 11 ug migawas ang resulta nga positibo alas-1 sa hapon sa maong adlawa.
Apan pasado alas-12 sa udto, namatay ang babae.
Ang 73-anyos nga babae gi-diagnose og acute respiratory failure type 1 secondary to community-acquired pneumonia. Ang iyang comorbidities mao ang chronic kidney disease secondary to hypertension ug diabetes mellitus nephropathy.
Ang patay'ng lawas sa babae, matud ni Retuya, gi-cremate mga alas 2 sa hapon Agosto 11.
Ang City Health Office nakaila og 13 ka mga close contacts sa babae, lima kanila mga direct family contacts ug walo ang mga personahe sa JR Borja General Hospital. Sila karon anaa sa city isolation unit.
Ang Purok 5, Zone 10 B, Upper Carmen gipailalom sa localized focused containment, matud ni Retuya.
Ang 73-anyos nga babae ang ikawalo nga kamatayon sa Covid-19 sa Cagayan de Oro ug ang ikaupat nga natala nga kamatayon sa Barangay Carmen.